Բրազիլիան ստեղծում է էլեկտրոնային լրտեսումից պաշտպանվելու համակարգ

1in.am-ը գրում է.

Բրազիլիայի նախագահ Դիլմա Ռուսեֆը հայտարարել է էլեկտրոնային փոստը լրտեսումից պաշտպանելու հատուկ համակարգի ստեղծման մասին:

«Ես հանձնարարել եմ տվյալների մշակման դաշնային ծառայությանը ներդնել հուսալի e-mail համակարգ՝ ողջ դաշնային կառավարության համար»,- գրել է Ռուսեֆը Twitter-ի իր միկրոբլոգում:

Նրա խոսքով՝ դա կլինի առաջին միջոցառումը՝ ուղղված պաշտոնական հաղորդագրությունների պաշտպանության ընդլայնմանն ու հնարավոր լրտեսման կանխմանը: 

Ավելի վաղ Էդվարդ Սնոուդենի գաղտնազերծած նյութերից պարզ էր դարձել, որ ԱՄՆ-ը Կանադայի հետ համատեղ զբաղվել է Բրազիլիայի լեռնաարդյունաբերության և էներգետիկայի նախարարության լրտեսմամբ: 

Բացի այդ, փաստաթղթերից հայտնի էր դարձել, որ ԱՄՆ-ը որսացել է նաև Բրազիլիայի նախագահի էլեկտրոնային նամակագրությունն ու հեռախոսազրույցները: Արդյունքում Ռուսեֆը հետաձգել է իր այցը ԱՄՆ, որը նախատեսված էր հոկտեմբերի 23-ին՝ փոխանցում է RIA Novosti-ն:

Իր հերթին երկրի կապի նախարար Պաուլու Բեռնարդուն հայտարարել է ազգային փոստային ծառայության հիման վրա էլեկտրոնային փոստի անվճար ծառայության ներդրման հնարավորությունն ուսումնասիրելու իշխանությունների պատրաստակամության մասին: Այն կլինի ներխուժումների դեմ լավ պաշտպանված: