«Իմ սրտի ուղեկից Երևան». Երևանի սրտում կայացավ «Էրեբունի-Երևան» տոնակատարության եզրափակիչ համերգը

1in.am-ը գրում է.

«Իմ սրտի ուղեկից Երևան» խորագիրը կրող Էրեբունի-Երևան- 2795 տոնակատարության վերջին նոտան, ավանդույթի համաձայն, դրվեց Հանրապետության հրապարակում: Օրվա գլխավոր միջոցառումը, որն այս անգամ կրեց «Իմ սրտի ուղեկից Երևան» խորագիրը, մեկնարկեց ժամը 19:30-ին: 

Տոնի կապակցությամբ մայրաքաղաք էին ժամանել Երևանի գործընկեր և քույր քաղաքների, ինչպես նաև հանրապետության մարզերի աննախադեպ թվով պատվիրակություններ, ուստի երեկոյի գեղարվեստական մասը ապահովեցին ինչպես հայաստանյան երգարվեստի երգիչ-երգչուհիներ, պարային խմբեր, այնպես էլ արտերկրից ժամանած հայտնի խմբեր ու ճանաչված երգիչներ: Համերգային ծրագիրն անցավ Նազենի Հովհաննիսյանի և Ավետ Բարսեղյանի հաղորդավարությամբ: Երևանի ծննդյան ամենակարևոր միջոցառման եզրափակիչ փուլի ընթացքում ելույթ ունեցան Էմմա Պետրոսյանը, Ռազմիկ Ամյանը, Նունե Եսայանը, Թաթան, Անուշ և Ինգա Արշակյանները: 

Նշենք, որ օրվա ընթացքում տոնական միջոցառումներ են տեղի ունեցել քաղաքի տարբեր հատվածներում և համայնքներում տեղադրված բեմահարթակներում. տոնական ուրախ մթնոլորտ է թևածել մայրաքաղաքի բոլոր վարչական շրջաններում: