Նիկոլի ողնաշարը

13:16 , 17 ապրիլ, 2026
Ոստիկանության 108-րդ տարեդարձին նվիրված կոլեգիայի հանդիսավոր նիստին գովաբանելով այդ կառույցը՝ Նիկոլը հայտարարել է, թե Ոստիկանությունը պետության ողնաշարն է, և այդ ողնաշարը միշտ պետք է ամուր լինի. դա բոլոր քաղաքացիների շահերից է բխում:

Իրականում պետության ողնաշարը բանակն է. առանց դրա չի կարող լինել ոչինչ՝ ո՛չ անվտանգություն, ո՛չ սուվերենութուն ու ո՛չ էլ պետություն առհասարակ: Ոստիկանության դերը, իհարկե, պետության մեջ շատ կարևոր է, քանի որ այն, ըստ էության, ներքին մարտահրավերների հաղթահարմանը կոչված բանակ է, որի որակից է կախված երկրի ներքին կայունությունն ու նվատնգությունը: Բայց ինչո՞ւ է Նիկոլը հենց Ոստիկանությունը հռչակել որպես երկրի ողնաշար: Այդպես է վարվել ի հակադրություն բանակի՝ փաստելով, որ Հայաստանը վերածվել է ոստիկանական երկրի:

Ներկա պայմաններում Ոստիկանությունն իրականում ոչ թե պետության, այլ ՔՊ-ական իշխանության ողնաշարն է՝ բառիս բուն իմաստով, և ասվածում համոզվելու համար պետք է ընդամենը նայել շուրջբոլորը. չլինեին ոստիկանները, Նիկոլը վաղուց իշխանության չէր լինի, և հենց այս գիտակցումն է, որ այսօր էլ ստիպում է Նիկոլին Ոստիկանության միջոցով զսպել ընդդիմությանը, գործեր «կարել», մարդկանց հետապնդել կամ բյուջեից իսկապես ահռելի միջոցներ հատկացնել այդ կառույցին:

Բոլոր քաղաքացիների շահերից բխում է ամուր պետականությունը, ներքին անվտանգության անսասանությունը, բայց ստացվել է այնպես, որ հենց ՔՊ-ական իշխանությունն է դարձել իրական մարտահրավեր այս երկրի համար. Հայաստանը դարձրել են Իլհամի տրամադրությունից կախ տված բրոշ, և Հայաստանը հետզհետե է՛լ ավելի է նմանվում թերզարգացած լատինաամերիկյան այն երկրներին, որտեղ պարզապես չկա ներքին անվտռանգություն,որտեղ քաոս է ու մարդասպանություն: