Լոնդոնի «Չելսին» կարող է «Բարսելոնայի» հարձակվող Ֆերան Տորեսի համար վճարել 80 միլիոն եվրո

Լոնդոնի «Չելսին» մտադիր է ամառային տրանսֆերային պատուհանի ընթացքում ուժեղացնել հարձակման գիծը։

Ինչպես տեղեկացնում է իսպանական Fichajes պարբերականը, «ազնվականների» գլխավոր տրանսֆերային նպատակը «Բարսելոնայի» 25-ամյա հարձակվող Ֆերան Տորեսն է։

Լոնդոնյան ակումբի ղեկավարությունը պատրաստ է իսպանացի ֆուտբոլիստի համար վճարել մեծ գումար՝ 80 միլիոն եվրո։ «Չելսին», որը աշխարհի ակումբային առաջնության և Կոնֆերենցիաների լիգայի գործող հաղթողն է, հարձակման գծում փնտրում է ունիվերսալ խաղացող, և Տորեսը լիովին համապատասխանում է այդ չափանիշներին։

Չնայած Ֆերան Տորեսը արդյունավետ մրցաշրջան է անցկացնում, կատալոնական ակումբի ֆինանսական խնդիրները կարող են վճռորոշ դեր խաղալ։ Նշվում է, որ «Բարսելոնայի» համար, որը դեռևս ֆինանսական միջոցների կարիք ունի, 80 միլիոն եվրոյին մոտ առաջարկը մերժելը գործնականում անհնար կլինի։

Ընթացիկ մրցաշրջանում Տորեսը «կապտանռնագույնների» կազմում մասնակցել է 29 հանդիպման՝ դառնալով 16 գոլի և 1 գոլային փոխանցման հեղինակ։