Սամվել Կարապետյանին «Երևան–Կենտրոն» ՔԿՀ–ից տեղափոխեցին տուն

 Tert.am-ը գրում է․

Քիչ առաջ Սամվել Կարապետյանին տեղափոխող ավտոմեքենան դուրս եկավ «Երևան–Կենտրոն» ՔԿՀ–ից, Կարապետյանին կալանավայրից տեղափոխեցին տուն։

ԱԱԾ–ի մոտ հավաքվել էին Կարապետյանի աջակիցները, որոնք վանկարկում էին՝ «Սամվել, Սամվել»։

Փաստաբան Արամ Վարդևանյանը մինչ այդ լրագրողների հետ զրույցում հայտնեց, որ դատարանը գործարարի նկատմամբ տնային կալանք կիրառելու որոշումը կայացրել էր ժամը 19։30-19։40-ի սահմաններում` արձանագրելով, որ կալանքը վերացվում է անհապաղ։

«Սահմանափակումներն ինտենսիվ կերպով կիրառվելու են։ Շփում կարող է լինել բացառապես մերձավոր ազգականների հետ։ Նախատեսված է նաև խոսքի սահմանափակում, ինչի վերաբերյալ առանձին անդրադարձ կկատարենք։ Որոշումը դեռևս ամբողջությամբ չենք ստացել։ Ստանալուն պես լրացուցիչ դիրքորոշում կհայտնենք։ Մեր պատկերացրած խափանման միջոցը պետք է լիներ կալանքի վերացումը»,- նշեց Վարդևանյանը։