ՔՊ-ական Ղազարյան Ալխասը չի գիտակցում ՀԱՊԿ-Հայաստան հարաբերությունների լիարժեք հստակեցման կարևորությունը

16:10 , 9 հոկտեմբեր, 2025
Հարցին՝ ՀԱՊԿ-ից ե՞րբ ենք դուրս գալու, ՔՊ-ական Ղազարյան Ալխասը «հետաքրքիր» պատասխան է տվել՝ ՀԱՊԿ-ից դուրս գալ-չգալը մեր կյանքում որևիցե էական բան չի փոխելու: Ըստ Ալխասի՝ իրենց խնդիրն է Հայաստանը դարձնել բարգավաճող, խաղաղ երկիր:

Ալխասը կենսական կարևորության այս հարցի նկատմամբ թեթևամիտ վերաբերմունք է դրսևորել՝ փորձելով հիմնավոր պատասխան տալուց խուսափել: Իրականում Հայաստանի համար ՀԱՊԿ-ի հետ հարաբերությունների հարցն ուղղակիորեն առնչվում է երկրի պաշտպանունակության, սահմանների անվտանգության և արտաքին քաղաքական հավասարակշռության հետ։

Երբ ՔՊ-ականն վստահեցնում է, թե իբր ՀԱՊԿ-ից դուրս գալը էական բան չի փոխի, դա նշանակում է, որ անուղղակիորեն ասում է՝ Հայաստանի անվտանգության հարցերը երկրորդական են, ինչը վտանգավոր ուղերձ է՝ հասարակությանը, որը սպասում է հստակ ռազմավարության, այլ ոչ թե անորոշ խոսքերի։ Եթե իշխանությունը չի ընդունում հստակ որոշում ու չի ցուցաբերում հստակ վարք, ապա Հայաստանը մնում է «կես ճանապարհին»․ ո՛չ լիարժեք դաշնակից հանդիսացող, ո՛չ ինքնուրույն պաշտպանական քաղաքականություն ունեցող պետությունը չի կարող հույս ունենալ, որ կարող է արդյունավետ պաշպանական համակարգ ունենալ։ Մնալով ՀԱՊԿ-ում՝ Հայաստանը չի կարողանում դառնալ Արևմուտքի լիարժեք դաշնակիցը, իսկ ՀԱՊԿ-ի հետ հարաբերոթյունները սառեցնելով՝ զրկվում է այդ կառույցից օգտվելու հնարավորություններից: Սա էականորեն թուլացնում է երկրի դիրքերը՝ այն Իլհամի բոստանը սարքելով։

Նիկոլը հենց այս հաշվարկից ելնելով էլ թերևս Հայաստանը թողել է կես ճանապարհին՝ մեզ Անկարայից կախման մեջ դնելով: