Իսրայելը կրկնակի հարված է հասցրել Գազայի հիվանդանոցներից մեկին. զոհվել է առնվազն 20 մարդ, այդ թվում՝ լրագրողներ
14:42 , 26 օգոստոս, 2025Իսրայելը կրկնակի հարված է հասցրել Գազայի հատվածի հարավում գտնվող Խան-Յունիս քաղաքի Նասեր հիվանդանոցին, ինչի հետևանքով զոհվել է 20 մարդ, այդ թվում՝ լրագրողներ և բուժաշխատողներ։
Առաջին հարվածի հետևանքով զոհվել է առնվազն 1 մարդ, մյուս 19-ը զոհվել են երկրորդ հարվածից հետո։ Ընդ որում, երկրորդ հարվածը հասցվել է դեպքի վայր փրկարարների և լրագրողների ժամանումից հետո։
Զոհված լրագրողներից հինգն աշխատում էին միջազգային լրատվամիջոցներում, ներառյալ՝ Associated Press-ում, Reuters-ում, Al Jazeera-ում և Middle East Eye-ում։
Իսրայելի վարչապետ Բենյամին Նեթանյահուն տեղի ունեցածն անվանել է «ողբերգական պատահար», ինչի համար Իսրայելը «խորապես ցավում է», և հայտարարել, որ զինվորականներն իրականացնում են «մանրակրկիտ հետաքննություն»։ Առողջապահության համաշխարհային կազմակերպության տվյալներով՝ հարվածներից տուժել են անհետաձգելի բուժօգնության, ստացիոնար և վիրաբուժական բաժանմունքները։ Կազմակերպության ղեկավար Տեդրոս Ադհան Գեբրեյեսուսը նշել է, որ վնասվել է նաև շարժական հրդեհային սանդուղքը։ Ականատեսների վկայությամբ՝ երկրորդ հարվածը ուղիղ հասցվել է փրկարար ծառայության աշխատակիցներին և լրագրողներին։ Համացանցում հրապարակված կադրերից երևում են զոհերի մարմինները։The first moments of the Israeli strike on Nasser Hospital in Khan Yunis, southern Gaza Strip. pic.twitter.com/eDj7GAWjmS
(@Timesofgaza) August 25, 2025
Զոհերից մեկը Reuters-ի օպերատոր Խուսամ ալ-Մասրին է։ Գործակալություը փոխանցել է, որ նա զոհվել է հիվանդանոցին առաջին հարվածի ժամանակ, երբ ուղիղ հեռարձակում էր իրականացնում Reuters-ի համար։ 33-ամյա Մարիամ Դագգան Associated Press-ի թղթակից էր ու հիվանդանոցից պարբերաբար տեսանյութեր էր պատրաստում։ Մուհամմեդ Սալաման էլ աշխատում էր Al Jazeera-ում և Middle East Eye-ում։ Զոհվել է Middle East Eye-ի ևս մեկ լրագրող՝ Ահմադ Աբու Ազիզը։ Մուաթհ Աբու Թահան էլ համագործակցում էր տարբեր պարբերականների հետ, այդ թվում՝ իսրայելական Haaretz-ի։ Իսրայելը միջազգային լրատվական գործակալությունների աշխատակիցներին թույլ չի տալիս մտնել Գազայի հատված։ Լրատվամիջոցներն օգտագործում են տեղի թղթակիցների կադրերն ու նյութերը։So israel killed 4 journalists at once today in Gaza. pic.twitter.com/ct6ifSUGIy
(@MuhammadSmiry) August 25, 2025
2023 թվականի հոկտեմբերի 7-ից ի վեր Գազայում զոհվել է ավելի քան 190 լրագրող, որոնց մեծ մասը պաղեստինցիներ են, որոնք զոհվել են իսրայելական հարվածների հետևանքով։ Երկու շաբաթ առաջ էլ իսրայելական հարվածի հետևանքով զոհվել էր Al Jazeera-ի լրագրող Անաս աշ-Շարիֆը։ Իսրայելական կողմը պնդում էր, թե, իբր, լրագրողը ղեկավարում է ՀԱՄԱՍ-ի ստորաբաժանումներից մեկը։ Խան-Յունիսի Նասեր հիվանդանոցին իսրայելական հարվածները քննադատել են ՄԱԿ-ի գլխավոր քարտուղար Անտոնիու Գուտերիշը, Ֆրանսիայի նախագահ Էմանուել Մակրոնը, Մեծ Բրիտանիայի արտաքին գործերի նախարար Դևիդ Լեմին, Գերմանիայի արտաքին գործերի նախարարությունը և այլն։ ԱՄՆ նախագահ Դոնալդ Թրամփն էլ հայտարարել է, որ չի իմացել հարվածների մասին, իսկ, պատասխանելով իր արձագանքի մասին լրագրողի հարցին, նշել է, որ «ուրախ չէ»։Nasser Hospital, Khanyounis, Gaza. pic.twitter.com/XyXEORGSob
(@Timesofgaza) August 25, 2025