Ծնողի դժգոհությունը «Գրանդ Սպորտից». արդյո՞ք լողի պարապունքների ընթացքում փոքրիկների համար ապահովվում են բավարար պայմաններ
19:51 , 11 հունիս, 2025«Գրանդ Սպորտ» մարզահամալիրի փոքր տարիքի հաճախորդների ծնողները կրկին բարձրացնում են բողոքի ձայներ՝ կապված երեխաների պայմանների հետ։
5 տարեկան երեխայի ծնողը նշում է, որ արդեն երեք անգամ բերում է երեխային պարապմունքի, սակայն ամեն անգամ ստիպված է լինում նյարդայնացած հեռանալ՝ անընդունելի պայմանների պատճառով։
Բողոքող ծնողի խոսքով՝ լողի պարապունքների ժամանակ հաճախ պնդում են, որ երեխաները չեն կարողանում օգտագործել իրենց հասանելիք փոքրիկների տարածքն ու պահարանները, պատճառաբանելով, որ դրանք արդեն զբաղված են։ Փոխարենը, նրանց առաջարկվում է օգտագործել մեծահասակների համար նախատեսված տարածքը, ինչը մի շարք հիգիենիկ ու առողջական ռիսկեր է պարունակում։ Մասնավորապես, ծնողը մտահոգված է այն փաստով, որ տարբեր տարիքային խմբերի խառը օգտագործումը կարող է երեխաներին ենթարկել վիրուսների և վարակների ռիսկին։
«Յուրաքանչյուր տարի ականատես ենք լինում, թե ինչպես է ամսական ու տարեկան վարձավճարների չափը աճում։ Բայց արդյո՞ք երբևէ մտածել եք այդ աճող վճարների համարժեք՝ մանկական ենթակառուցվածքների բարելավման մասին։ Արդյո՞ք նորմալ է, որ մեծ թվով երեխաների պարապմունքներ կազմակերպելու պատրաստակամություն ունեք, սակայն մանուկների տարածքը ոչ միայն չի ընդլայնվում, այլև լիարժեք հասանելի չէ նրանց», – ասում է ծնողը։