Մեքսիկայի Ակապուլկո զբոսավայրում հորդառատ անձրևները նոր ջրհեղեղի են հանգեցրել

1in.am-ը գրում է.

Մեքսիկայի հայտնի Ակապուլկո զբոսավայրը չէր հասցրել վերականգնվել «Մանուել» ցիկլոնի հարվածից, երբ այն պատուհասեցին հորդառատ անձրևները: Ինչպես հայտնում են տեղի իշխանությունները, անձրևները ջրհեղեղ են հարուցել քաղաքի որոշ շրջաններում, որոշ վայրերից տարահանում են բնակիչներին: Այս մասին հայտնում է ITAR-TASS-ը: 

Ակապուլկոյի մի շարք փողոցներում, որտեղ ջրի մակարդակը հասել է կես մետրի, դադարեցվել է ավտոմոբիլային երթևեկությունը, որոշ տների բնակիչներ ստիպված են եղել ջրի հոսքից փրկվելու համար բարձրանալ տների տանիքները: 

Ստեղծված իրավիճակով պայմանավորված իշխանությունները ժամանակավորապես չեղյալ են հայտարարել դպրոցներում դասերը: 

Տուժածներին օգնելու գործում ներգրավված են բանակի ստորաբաժանումներն ու ոստիկանությունը: