Իրաքում երկու ահաբեկչության հետևանքով 33 մարդ է զոհվել
10:00 , 12 սեպտեմբեր, 2013
Emedia.am-ը գրում է.
Բաղդադի շիական մզկիթի մոտ սեպտեմբերի 11-ի երեկոյան տեղի ունեցած երկու ահաբեկչությունների հետևանքով 33 մարդ է զոհվել:
Ահաբեկչությունն իրականացվել է այն պահին, երբ հավատացյալները մզկիթից դուրս են եկել: Այս մասին հայտնում է Reuters-ը՝ հղում կատարելով Իրաքի ոստիկանությանը:
Երկու պայթյունների հետևանքով ևս 55 մարդ ստացել են ծանր մարմնական վնասվածքներ:
Ականատեսների խոսքերով՝ սկզբում պայթել է մզկիթի մոտ կայանած ականապատ ավտոմեքենան: Իսկ նրանից հետո, երբ մարդիկ հավաքվել են պայթած ավտոմեքենայի շուրջ՝ մահապարտ-ահաբեկիչը պայթեցրել է իրեն մարդկանց այդ խմբի մեջ, հաղորդում է Lenta.ru-ն:
Դրանից հետո ոստիկանությունը ձերբակալել է մի հոգու, ով, ոստիկանների խոսքերով, պատրաստվել է իրեն պայթեցնել, սակայն տեղի բնակիչները ահաբեկչին խլել են ոստիկանների ձեռքից և տեղում սպանել նրան:
Նշենք, որ բացի մզկիթի մոտ տեղի ունեցած ահաբեկչությունից, այլ հարձակումներից Իրաքում սեպտեմբերի 11-ին զոհվել է ևս 9 մարդ: