Լեհ լրագրողը հիացած է «Magic Karabakh»-ով
12:31 , 10 սեպտեմբեր, 2013Panorama.am-ը գրում է.
Ազգությամբ լեհ Բլաժեյ Տորանսկին արդեն երկրորդ անգամ է Հայաստանում, ու արդեն այնքան հոգեհարազատ է այստեղ ամեն բան նրան, որ իր ընկերոջ ուղեկցությամբ է ժամանել Հայաստան և վերջինիս համար է բացահայտում Հայաստանը: Սակայն Բլաժեյը առաջին անգամ է, որ Արցախում էր, և երբ խնդրեցի երկու բառով ներկայացնել Արցախից իր ստացված տպավորությունները, առանց վարանելու պատասխանեց. «Magic Karabakh»:
Լեհ լրագրողների միության անդամ, «Sdp.pl» ինտերնետ-պորտալի լրագրող Բլաժեյի հոբբին ճամփորդություններն են, որոնց նա նվիրել է կյանքի մեծ մասը` եղել է 70-ից ավելի երկրներում, այդ թվում և Լատինական Ամերիկայում, Արևելքում: Իր համար շատ յուրատիպ է Կովկասը` Հայաստանն ու Վրաստանը, բայց նշում է, որ երբևէ չի մտածել Ադրբեջան այցելելու մասին, նման ցանկություն չի ունեցել. «Չի քաշում.... մագնետիզմ չկա ինձ համար այդ երկրում»:
Երբ նկատեցի, որ դժվար էլ այլևս կարողանա այցելել Ադրբեջան, անգամ եթե օրերից մի օր իր համար այդ երկիրը մագնետիզմ ձեռք բերի, քանի որ Արցախ այցելածներին Ադրբեջանը ջանասիրաբար ներառում է սև ցուցակի մեջ, Բլաժեյը միայն ուսերը թոթվեց ու նշեց. «Ոչինչ. Արցախը դա արժեր»:
Ամենամեծ տպավորությունը Բլաժեյի վրա գործել է Դադիվանքը: Տպավորությունների ներքո նա անգամ տեղադրել է Դադիվանքի լուսանկարը facebook-յան իր էջում ու վերնագրել. «Այնտեղ, ուր զբոսաշրջիկները չեն հասնում»: Իր այս գրառումը բացատրում է նրանով, որ Դադիվանք հասնելու համար լուրջ ջանքեր է անհրաժեշտ գործադրել, քանի որ ոչ ավտոբուս է այնտեղ հասնում, ոչ էլ տրանսպորտի այլ տեսակ, բայց անգամ իր ընկերների թվում գտնվել են մարդիկ, որ Դադիվանքի հմայքը անձամբ են տեսել, ինչպես և Գանձասարինը. «Շատ սիրեցի Արցախը, յուրատիպ է, անկրկնելի ու դյութիչ Արցախը»,- իր տպավորությունն ավելի ավարտուն դարձնելու համար ասաց նա:
Ամբողջական հոդվածը կարող եք կարդալ այստեղ