Խոշոր գումար, կեղծամներ, անձնագրեր, ոսկու ձուլակտորներ. ինչ է հայտնաբերվել Պրիգոժինի աշխատասենյակում և տանը խուզարկությունների ժամանակ (Photo, Video)
10:54 , 6 հուլիս, 2023ՌԴ իրավապահ մարմինները «Վագներ» մասնավոր ռազմական ընկերության հիմնադիր Եվգենի Պրիգոժինի աշխատասենյակում և տանը խուզարկության արդյունքում հայտնաբերել են կեղծամներ, զենքեր, խոշոր գումարներ և անձնագրեր, հայտնել են «Ռոսիա 1» հեռուստաալիքի «60 րոպե» հաղորդման ժամանակ։
Կադրերում երևում է, թե ինչպես են ուժայինները մտնում գրասենյակ՝ ցույց տալով փողով ստվարաթղթե արկղեր (ըստ Fontanka-ի՝ խոսքը 10 միլիարդ ռուբլու մասին է): Տարածքում հայտնաբերվել են զենքեր և պարկուճներ, մի քանի անձնագիր, կեղծամներ, ոսկու ձուլակտորներ, տարբեր արժույթներով գումար։
Պրիգոժինի մոտ խուզարկությունները տեղի են ունեցել հունիսի 24-ին դեպի Մոսկվա նրա նախաձեռնած «արդարության երթի» կապակցությամբ։
Հիշեցնենք, որ լույս 24-ը «Վագներ» մասնավոր ռազմական ընկերության ուժերը Դոնի Ռոստովում գրավել էին Հարավային ռազմական օկրուգի շտաբը։ Դա տեղի էր ունեցել Եվգենի Պրիգոժինի այն հայտարարության ֆոնին, թե իբր ՌԴ ԶՈւ–ն հրթիռառումբային հարվածներ է հասցրել «Վագներ»-ի ճամբարներին, ինչը հերքել էր և՛ ՊՆ–ն, և՛ ԱԴԾ–ն։ Պրիգոժինի դեմ զինված ապստամբություն կազմակերպելու հոդվածով քրեական գործ էր հարուցվել։
ՌԴ նախագահ Վլադիմիր Պուտինը ապստամբների գործողությունները որակել էր «հանցավոր արկածախնդրություն», «հարված թիկունքից» և «դավաճանություն»։
Ավելի ուշ Բելառուսի նախագահի մամուլի ծառայությունը հայտարարել էր, որ Ալեքսանդր Լուկաշենկոն բանակցել է Պրիգոժինի հետ, և նա ընդունել է Ռուսաստանի տարածքում «Վագների» շարժը դադարեցնելու առաջարկը: Դրանից հետո ՌԴ նախագահի մամուլի քարտուղար Դմիտրի Պեսկովը հայտնել էր, որ «Վագներ»-ի ղեկավարը կմեկնի Բելառուս, իսկ քրեական գործը կկարճվի։Հունիսի 28-ին հայտնի է դարձել, որ Ռուսաստանի ԱԴԾ-ում կարճվել է զինված ապստամբության գործը։