Ադրբեջանցիները փորձում են Երևանը ներկայացնել որպես երբեմնի ադրբեջանական քաղաք. Գևորգ Մելքոնյան

Tert.am-ը գրում է.

Ադրբեջանցի պատմաբանները փորձում են Երևանը միջազգային հանրությանը ներկայացնել իբրև երբեմնի ադրբեջանական քաղաք, այսօր լրագրողների հետ հանդիպմանը ասաց ԵՊՀ դասախոս, պատմական գիտությունների թեկնածու Գևորգ Մելքոնյանը, ով օգոստոսի 21-29-ը մասնակցել է Մոսկվայում կայացած ԱՊՀ և Մերձբալթյան երկրների երիտասարդ գիտնականների համաժողովին:

Նա նշեց, որ գիտաժողովին ինքը ներկայացրել է 1915թ-ին Հայոց ցեղասպանության խնդիրը։ Գևորգ Մելքոնյանը նշեց, որ գիտաժողովի ընթացքում Ադրբեջանի պատվիրակությունը զարմանալիորեն լուռ լսել ու չի միջամտել:

«Ադրբեջանի ներկայացուցիչը խոսեց մեր երկրի մասին: Նա ասաց, որ հայերը տեղաբնիկ ժողովուրդներ չէին ու եկել էին Եվրոպայից, հին հունական պատմական աղբյուրներն էին մեջբերում: Այնուհետև ներկայացրին, որ հայերի հիմնական հայրենիքը Արևմտյան Հայաստանի տարածքն է ու միայն Ցարական Ռուսաստանի քաղաքականության հետևանքով է, որ հայերը եկել են Արևելյան Հայաստան ու հիմնվել չակերտներում ասված ադրբեջանական տարածքում»,- ասաց նա:

Ինչ վերաբերում է նրան, որ նույն համաժողովին ադրբեջանցի պատմաբանը Երևանը համարել է ադրբեջանական քաղաք ու ներկայացրել այնպես, իբր հայերը ադրբեջանցիներից են խնդրել իրենց տալ այդ քաղաքը, բոլոր ներկաների շրջանում ծիծաղ է առաջացրել:

«Բոլորը գիտեին Ուրարտական պատմության մասին, հին ուրարտական մշակույթի մասին: Ի պատասխան լսարանի արձագանքի՝ ասացին մենք ունենք փաստաթղթեր, որ հայերը մեզ դիմել են, ասացին՝ դրանք մեր արխիվներում են, եկեք ու ուսումնասիրեք»,- պատմեց Գևորգ Մելքոնյանը:

Ըստ նրա՝ ադրբեջանցի պատմաբանի մեկ այլ ելույթ ևս ծիծաղի առարկա է դարձել, երբ նա ներկայացրել է իր թեման՝ «Ադրբեջանի հին ցեղերի պատմություն»:

«Ռուս նշանավոր պատմաբաններից մեկը ընդհատեց նրան ու ասաց՝ մինչև սկսելը գոնե երկու ցեղի անուն տվեք: Նա տվեց իրանական ցեղերի անուններ, ռուս պատմաբանը ասաց՝ չենք հասկանում, դուք հիմա ադրբեջանցի եք, թե իրանցի: Այս թեմայով ելույթը տեղի չունեցավ»,- ասաց նա:

Ամբողջական հոդվածը կարող եք կարդալ այստեղ