ՔՊ-ականների կողմից Նիգավանում հնչած կրակոցների հետևանքով զոհերի թիվը դարձավ 2, պարզվել է նրանց և վիրավորների ինքնությունը


09:52 , 20 հունիս, 2022

Հայաստանի քննչական կոմիտեի Արագածոտնի մարզային քննչական վարչության պետ Սամվել Սիմոնյանի որոշմամբ քննչական խմբի ղեկավար նշանակված նույն վարչության հատկապես կարևոր գործերով ավագ քննիչ Ստեփան Սուքիասյանի կողմից հարուցված քրեական գործի շրջանակում և ոստիկանության Արագածոտնի մարզային վարչության ու ոստիկանության Ապարանի բաժնի ծառայողների կողմից պարզվել է երեկ՝ հունիսի 19-ին, Նիգավան գյուղում տեղի ունեցած միջադեպի ու կրակոցների հետևանքով հիվանդանոց տեղափոխված մահացածի ու վիրավորների ինքնությունը։

Հիվանդանոց են տեղափոխվել Ապարան քաղաքի բնակիչներ՝ 27-ամյա Հմայակ Միքայելյանը, ով, գիտակցության չգալով, մահացել է, վիրավորներ՝ 19-ամյա Տիգրան Ղազարյանը, 33-ամյա Արմեն Բաղդասարյանը, 27-ամյա Սամվել Սանդրոյանը, 28-ամյա Տիգրան Հարությունյանը, 18-ամյա Հրաչյա Երեմյանը և 32-ամյա Սասուն Հայրապետյանը։ Վերջիններս Ապարանի հիվանդանոցում անհրաժեշտ բուժօգնություն ստանալուց հետո տեղափոխվել են. մի մասը՝ Երևանի «Աստղիկ», մի մասը՝ «Արմենիա» բժշկական կենտրոններ։  Ժամեր անց «Արմենիա» ԲԿ-ից «Աստղիկ» ԲԿ տեղափոխված Տ. Հարությունյանը , գիտակցության չգալով, մահացել է։

Հ. Միքայելյանը ծառայում էր ՀՀ ՊՆ Նուբարաշենում տեղակայված զորամասում։ 

Հիշեցնենք, որ երեկ՝ հունիսի 19-ին, կրակոցներ և սպանություն էր տեղի ունեցել Արագածոտնի մարզում:   Ժամը 20:30-ի սահմաններում «Ապարան» բժշկական կենտրոնից ոստիկանության Ապարանի բաժին ահազանգ էր ստացվել, որ տարբեր աստիճանի մարմնական վնասվածքներով, այդ թվում՝ հրազենային, իրենց մոտ են տեղափոխվել 7 քաղաքացի:   Հիվանդանոց էին ժամանել ոստիկանության Արագածոտնի մարզային վարչության պետ Տիգրան Կարապետյանը, ոստիկանության Ապարանի բաժնի պետ Աշոտ Հայրապետյանը, Հայաստանի քննչական կոմիտեի Արագածոտնի մարզային քննչական վարչության պետ Սամվել Սիմոնյանը:   Հիվանդանոցում բժիշկները ոստիկաններին և քննիչներին հայտնել էին, որ վիրավորներից մեկը, գիտակցության չգալով, մահացել է, իսկ 6 հոգի տեղափոխվել էին. մի մասը՝ Երևանի «Արմենիա», մի մասը՝ «Աստղիկ» բժշկական կենտրոններ:  

Ոստիկաններն ու քննիչները տաք հետքերով պարզել էին, որ միջադեպը, որն այնուհետև զուգորդվել էր կրակոցներով, տեղի էր ունեցել Նիգավան գյուղի վարչական տարածքում գտնվող՝ ժողովրդին հայտնի աղբանոցների հարևանությամբ:  

Ոստիկանները, քննիչները, ոստիկանության Արագածոտնի մարզային վարչության քրեագետները՝ ոստիկանության Ապարանի բաժնի մեծ թվով քրեական հետախուզության և համայնքային ոստիկանության բաժանմունքների ծառայողների հետ, հետախուզական աշխատանքներ էին կատարել, թե աղբավայրի կոնկրետ որ հատվածում էր տեղի ունեցել դեպքը:  

Փաստի առթիվ Հայաստանի քննչական կոմիտեի Արագածոտնի մարզային քննչական վարչության պետ Ս․ Սիմոնյանի որոշմամբ ստեղծվել էր քննչական խումբ՝ նույն վարչության հատկապես կարևոր գործերով ավագ քննիչ Ստեփան Սուքիասյանի գլխավորությամբ:

Նշենք, որ ի տարբերություն ոստիկանության, լրատվամիջոցները հայտնում են, որ կրակոցներ հնչել և վեճ տեղի է ունեցել ՔՊ֊ական պատգամավոր Մաթևոս Ասատրյանի հարազատների, ՔՊ֊ական Արագածոտնի փոխմարզպետ Էդգար Փարվանյանի հորեղբոր որդու և ապարանցի մի խումբ երիտասարդների միջև, ինչի հետևանքով վերոնշյալ մարդիկ կրակել են երիտասարդների վրա։ Լրատվամիջոցները նշում են, որ միջադեպը քաղաքական ենթատեքստ ունի։