Մայրաքաղաքի քարե վկաները - «Մոխիրներից հառնած մայրը»

10:07 , 29 օգոստոս, 2013

Հուշարձանը նվիրված է 1915թ. եղեռնի նահատակներին և հրաշքով փրկվածներին:

2002 թ. հունիսի 1-ին Ծիծեռնակաբերդի հուշահամալիրում տեղի ունեցավ հուշարձանի նվիրաբերման արարողությունը: Արձանը նվիրաբերվել է Էսքիջյան և Լազարյան ընտանիքների կողմից (ԱՄՆ): Բնօրինակը գտնվում է Լոս Անջելեսի Արարատ Էսքիջյան թանգարանում:

Արձանի հանդիսավոր բացմանը խոսք ասաց «Առդա» բարեգործական հիմնադրամի գործադիր տնօրեն դոկտոր Պետրոս Մալաքյանը: Օրհնության և շնորհավորանքի խոսք ասաց Հայ ավետարանչական ընկերության Հայաստանի ներկայացուցիչ Ռընե Լևոնյանը:

Արձանը բացելու պատիվը տրված էր «Առդա»-ի նախագահ Ստիվ Լազարյանին:

Խոսք ասացին նաև Ցեղասպանության թանգարանի տնօրեն Լ. Բարսեղյանը, արձանի հեղինակը` քանդակագործ Ռոստոմ Ավետիսյանը: Երգչուհի Գոհար Ազիզյանը կատարեց շարականներ: Արարողությունն ավարտվեց Արագածոտնի թեմի առաջնորդական տեղակալ Վազգեն վարդապետ Միրզախանյանի աղոթքով: 

Արձանի նյութը` բրոնզ, բազալտ, բարձրությունը 2,2 մ, քանդակագործ` Ռոստոմ Ավետիսյան: