Անորակ հրթիռները ձեռք են բերվել Փաշինյանի օրոք

168.am-ը գրում է․

Ազգային անվտանգության ծառայությունը (ԱԱԾ) սեպտեմբերի 25-ին դարի բացահայտումը ազդարարող իրեն բնորոշ ոճով հաղորդագրություն էր տարածել, որ խոշոր չարաշահումներ թույլ տալու պատճառով ձերբակալվել է ՀՀ զինված ուժերի ավիացիայի նախկին պետ-վարչության պետ Ավետիք Մուրադյանը: Ուժային այդ կառույցի հաղորդագրության մեջ, մասնավորապես, ասվում էր.

ԱԱԾ հաղորդագրության մեջ նշվում է նաև, որ մատակարարումից որոշ ժամանակ անց հրթիռների մի մասը չեն կրակվել և դուրս են հանվել հաշվեկշռից, իսկ մնացածն ընդհանրապես չեն կիրառվել, այդ թվում՝ 2020 թվականի սեպտեմբերի 27-ին սկսված 44-օրյա պատերազմի ժամանակ:

ԱԱԾ այդ հայտարարության մեջ, սակայն, մի շատ կարևոր հարցի պատասխան բացակայում է՝ ե՞րբ է գնվել 2011 թվականին ՊՆ-ի կողմից չընդունված վերը նշված ռազմամթերքը:

Ըստ Օհանյանի՝ ԱԱԾ-ն պետք է ազնվորեն ասի, որ 2011 թվականին անորակ լինելու պատճառով պաշտպանության նախարարությունն այդ ռազմամթերքը չի ընդունել, ի պահ է վերցրել, մինչև որ մատակարար կազմակերպությունը որոշի դրա ելքը, այն է՝ ձեռք կբերի թույլտվություն տարանցիկ փոխադրման, կամ այլ երկիր մատակարարելու, վաճառելու համար: Նշենք, որ ռազմամթերքի խմբաքանակի մոտ 30 տոկոսն ընդունվել է Գլխավոր շտաբի կողմից և 70 տոկոսն է համարվել անորակ:

Նիկոլ Փաշինյանի «Քաղաքացիական պայմանագիր» կուսակցության և ԱԺ իշխանական խմբակցության պատգամավոր Անդրանիկ Քոչարյանը Հանրային Հեռուստաընկերության եթերում շտապել է այս հարցում ևս սլաքն ուղղել նախկինների ուղղությամբ՝ ակնարկելով, թե իբր հրթիռները գնվել են 2016-ին:

«Մենք արձանագրեցինք, որ այն հրթիռները, որ պետք է խոցեին հակառակորդի դիրքերը և տեխնիկան, նրանք չեն համապատասխանել այն տրամաբանությանը, որի համար իրենք ձեռք են բերվել: Բայց գնել ենք: Գնելուց հետո մի հատ էլ վերաձևակերպել ենք, հաստատել ենք: Եվ, վերջիվերջո, հարց է առաջանում՝ ինչի՞ համար է այդ գեներալը ստացել այդ բարձրաստիճան կոչումը: Ավիացիայի օգտագործումը տեսանելի էր 2016-ին, երբ այդպես էլ մեր ավիացիան որևէ ձև չօգտագործվեց քառօրյա պատերազմին: Դա բացահայտված է և մեր եզրակացության մեջ ֆիքսված է: Իսկ 44-օրյային մենք ունեցանք մի քանի թռիչք, որոնցից երկուսը մենք ինքներս խփեցինք, կորցրեցինք ինքնաթիռները, մյուսը հաջող թռիչք ունեցավ, կարողացավ վերադառնալ, և կասկածներ կան, որ մեր ինքնաթիռներից մեկն էլ պատահաբար խոցվել է նաև մեր կրակոցի արդյունքում: Դա պետք է քննիչ հանձնաժողովն ուսումնասիրի: Բայց որ մեր 2 անհաջող թռիչքները հյուսիսային հատվածում տեղի է ունեցել ոչ պրոֆեսիոնալ պատրաստվածության պատճառով, դա բոլորը գիտեն, դրա մասին զինված ուժերում բոլորը գիտեն»,- շարունակել է Ա. Քոչարյանը:

Ըստ էության, իշխող ուժի ներկայացուցիչը հաստատել է «Ռազմավարությունների և տեխնոլոգիաների վերլուծական կենտրոնի» ռուս փորձագետների հետազոտություն-պնդումները:

«Պատերազմի ժամանակ հայկական Ռազմա-օդային ուժերի (ՌՕՈՒ) և Հակաօդային պաշտպանության (ՀՕՊ) միջև քիչ համագործակցություն է եղել: Ըստ տեղի աղբյուրի՝ սեփական կրակից խոցվել է մինչև հինգ թռչող սարք՝ 4 Սու-25 գրոհային օդանավ և մեկ Մի-8 օդանավ»,- ասվում է հետազոտության մեջ:

Վերադառնալով անորակ հրթիռների գնմանը, նշենք, որ ձերբակալված Ավետիք Մուրադյանը Զինված ուժերի ավիացիայի պետ-վարչության պետի պաշտոնից ազատվել է 2019թ. մարտի 12-ին: Այսինքն, նա հասցրել է աշխատել Փաշինյանի կառավարության հետ:

Մեր տեղեկություններով, անորակ հրթիռներն իրականում գնվել են հենց 2018 թվականին: Պաշտպանության նախկին նախարար, ԱԺ «Հայաստան» ընդդիմադիր դաշինքի ղեկավար Սեյրան Օհանյանը 168.am-ի հետ զրույցում հաստատեց մեր տեղեկությունը:

«Գնումը կատարվել է 2018-2019 թվականներին»,- ասաց նա:

Հավելենք, որ 2018 թվականի մայիսի 24-ից մինչև 2020 թվականի հունիսի 8-ը ՀՀ ԶՈՒ գլխավոր շտաբի պետ է եղել Արտակ Դավթյանը, ով կրկին Նիկոլ Փաշինյանի կողմից նույն պաշտոնին է նշանակվել նաև 2021 թվականի մարտի 22-ին:

Նշենք, որ մամուլում հրապարակումներ եղան, որ ժամանակին Արտակ Դավթյանը հարցաքննվել է նաև Հայաստանին զենք մատակարարող Դավիթ Գալստյանի՝ (Պատրոն Դավիթ) գործով:

ԱԱԾ-ն տարածել էր հաղորդագրություն, որ Դավիթ Գալստյանի ղեկավարած ընկերությունը պետք է պաշտպանության նախարարությանը մատակարեր 1983-1986թթ. արտադրության հրանոթի համապատասխան տրամաչափի արկեր, սակայն մատակարարել է 1977 թվականի չեխական արտադրության մեկ այլ տեսակի հրանոթի արկեր, որոնցով անհնար է եղել լուծել մարտական խնդիրներ։

«Հրապարակի» հետ զրույցում հարցին՝ պայմանագիրը գուցե ավելի վաղ՝ 2017 թվականին է կնքվել, բայց մատակարարումն ու փորձարկումը տեղի է ունեցել 2018-ի մայիսից հետո, այսինքն՝ Դուք ստորագրել եք, որ ամեն ինչ նորմալ է, որևէ խնդիր չկա մատակարարված զենքերի կամ զինամթերքի հետ, Արտակ Դավթյանը պատասխանել էր. «Եթե մայիսից հետո է եղել, այո՛»:

Ինչ վերաբերում է ԱԱԾ հայտնաբերած վերջին չարաշահմանը, ապա այս մասով չհաջողվեց կապ հաստատել Արտակ Դավթյանի հետ: Պարզաբանում ստանալուն պես այն կհրապարակենք: