Եվրո-2020. Հրաշք՝ վերջին պահին․ Ուկրաինան 1/4-ում է

armsport.am-ը գրում է․

Եվրո-2020-ի 1/8 եզրափակչի վերջին զույգի՝ Շվեդիայի ու Ուկրաինայի խաղի հիմնական ժամանակն ավարտվեց ոչ-ոքի՝ 1-1 հաշվով։

Հանդիպման հաշիվը 27-րդ րոպեին բացեց ուկրաինացի ֆուտբոլիստ Զինչենկոն, ինչին շվեդները կարողացան պատասխանել միայն 43-րդ րոպեին․ աչքի ընկավ Ֆորսբերգը։ Թեև դրանից հետո հատկապես շվեդները մի քանի հարմար պահ ունեցան, բայց գնդակը համառորեն չէր հայտնվում ցանցում։

Խաղը տեղափոխվեց լրացուցիչ ժամանակ։ 99-րդ րոպեին Դանիելսոնը բաց ոտքով ընդառաջ գնաց Արտյոմ Բեսեդինին և կոպիտ խախտման համար ուղիղ կարմիր քարտով հեռացվեց խաղադաշտից։ Երբ թվում էր՝ ականատես ենք լինելու 11-մետրանոցների, վերջին պահին՝ լրացուցիչ ժամանակին ավելացված 1-ին րոպեին Արտյոմ Դովբիկը, որ խաղադաշտ էր դուրս եկել միայն 105-րդ րոպեին, մոտ տարածությունից՝ գլխի գեղեցիկ հարվածով գրավեց շվեդների դարպասն ու Ուկրաինայի հավաքականին դուրս բերեց քառորդ եզրափակիչ, որտեղ նրանց սպասում է Անգլիան։