«Եկեք խուսափենք դրանից». Մարտին Վարդազարյանի կոչը ակտիվիստներին


22:21 , 13 օգոստոս, 2013

Hayeli.am-ը գրում է.

Քաղաքապետարանի առջեւ արդեն 18-րդ օրը նստացույց անող երիտասարդները, ինչպես երեւում է՝ չեն պատրաստվում նահանջել: Ինչ են մտածում քաղաքապետարանում եւ ինչպես պետք է խնդիրը հանգուցալուծվի: Hayeli.am-ը այս եւ այլ հարցերի վերաբերյալ փոքրիկ զրույց ունեցավ ՀՀ արվեստի վաստակավոր գործիչ, պրոֆեսոր, Երևանի ավագանու ՀՀԿ խմբակցության անդամ Մարտին Վարդազարյանի հետ:

Պարոն Վարդազարյան, ի՞նչ եք մտածում երիտասարդ ակտիվիստների պայքարի մասին:

-Երիտասարդական զգացմունքային ըմբոստությունը բավականին ազնիվ եւ ազդեցիկ ուժ է, բայց երբ ըմբոստությունը վերածվում է «ըմբոստություն հանուն ըմբոստության», դա սկսում է ծառայել այլ շահագրգիռ ուժերի:Ես հիշում եմ իմ երիտասարդությունն ու պատանեկությունը եւ իմ տարիքային բարձունքից նայելով այդ ամենին՝ գտնում եմ նաեւ թույլ տված սխալները: Մի խորհուրդ պետք է տամ՝ մի պահ սթափ մտածենք, օգտվենք ստեղծված հնարավությունից՝ կոնստրուկտիվ երկխոսության , այլապես հիշում եք, Բիսմարկի խոսքերը.«Հեղափոխության գաղափարը հղանում է հանճարների մտքում, իրականացնում են նվիրյալ ֆանատիկոսները, օգտվում են …»: Եւ ուրեմն, սթափ լինենք մեր ըմբոստությամբ չծառայենք այդ ուժերի շահերին: Խորհուրդ եմ տալիս ստեղծված իրավիճակից դուրս գալու համար ընդունել կոնստրուկտիվ երկխոսությունը որպեսզի նաեւ տհաճ հետեւանքներից խուսափենք:

Կարծես թե Ձեզ հայտնի են՝ ո՞ր ուժերն են փորձում օգտվել այս ամենից:

-Գիտեք՝ ոչ թե հայտնի են, այլ աշխարհում օգտագործվող տեխնոլոգիաներն սրանք, պարզ ճշմարտություն, գուցե չափազանցնում եմ, բայց նպատակն է մեր հանրապետությունում անկայունություն ստեղծել: Եկեք խուսափենք դրանից:

«Կոնստրուկտիվ երկխոսություն» ասվածը Տարոն Մարգարյանի՝ հանդիպման առաջարկի՞ն է վերաբերում, որից հրաժարվեցին ակտիվիստները:

Այո:

Ձեր կարծիքով ի՞նչն է խանգարում Տարոն Մարգարյանին ինքն անձամբ իջնել եւ զրուցել ակտիվիստների հետ ու հասկանալ նրանց, ի վերջո, ակտիվիստներից շատերը նրա տարիքակիցներն են:

Գիտեք՝ ինքնաբուխ, անկազմակերպ շարժում է, իսկ «սպիտակ ձեռնոցով» ղեկավարներ չկան եւ յուրաքանչյուր րոպեն կարող է օգտագործվել պրովոկացիոն դրսեւորումների համար, որոնք անցանկալի են:

Պարոն Վարդազարյան, Երեւանի ավագանիում քննարկվե՞լ է ակտիվիստների ներկայացրած պահանջները, օրինակ Տրանսպորտի վարչության պետի հրաժարականի հարցը, ի՞նչ են մտածում այնտեղ:

Սա ծայրահեղություն է, որովհետեւ իրավիճակի բացատրությունը եւ ինքնին իրավիճակը ընկալելու եւ հասկանալու ընդունակությունը մասսայական, զանգվածային հիպնոսի տեխնելոգիաների շնորհիվ մեծ վնաս կարող է հասցնել բոլորիս:

Երկխոսության դեպքում, ըստ Ձեզ՝ ի՞նչ կարող է առաջարկել Տարոն Մարգարյանը, որը կբավարարի երիտասարդներին:

Ինչ-որ պարզաբանումներ, եթե դրանց մոտանեն գիտակցաբար, կարող են շտկվել եւ բերել այն արդյունքներին, որոնք օգտակար կլինեն թե տնտեսությանը, թե քաղաքին, թե յուրաքանչյուր քաղաքացուն:

Պարոն Վարդազարյան, կասեք՝ ինչո՞ւ ուղեվարձի սակագնի թանկացման հարցը չքննարկվեց ավագանիում եւ որոշումը այդպիսով դարձավ անօրինական: Դուք դժգոհություն բարձրացրել եք այս առնչությամբ, ի վերջո, ավագանին արհամարհվել է:

Գիտեք՝ դա պարտադիր պայման չէր, որ ուղեվարձի թանկացման հարցը ավագանիում քննարկվեր, հարցը Տրանսպորտային վարչությունում է քննարկվել:  Քննարկման չդրվեց նաեւ, երբ մետրոն 40 դրամից թանկացավ 100 դրամ: Մի հանգամանք եւս այն ժամանակ սոցիալապես ավելի վատ պայմաններ էին, քան հիմա: Իհարկե, ուղեվարձի թանկացումը բնակչության վիճակի վրա ազդող միջոց է, բայց եթե համեմատենք այլ քաղաքաների հետ, բավական էժան է: Եւ այս ամենը օգտագործվում է մեր երկրի ներսում ոչ այնքան բարյացկամ տրամադրված մարդկանց կողմից , եւ  երեւում է աշխարհին, թե այնքան աղքատ են, որ 50 դրամի համար աղմուկ են բարձրացնում: Սա էլ հակապրոպագանդա է դառնում:

Անի Սահակյան