Հնագույն ժամանակների խորհրդավոր լաբիրինթոսները. դրանք գոյություն ունեն մինչ օրս

Մինոտավրոսի խորհրդավոր լաբիրինթոսը միակը չէ պատմության մեջ։ Գոյություն ունեն նաև այլ լաբիրինթոսներ՝ առավել հետաքրքիր ու միստիկ։ Մինչ օրս պարզ չեն, թե ովքեր և ինչու են դրանք կառուցել, ինչ դեր են դրանք ունեցել հնագույն մարդկանց կյանքում։

Ամենեմհեթ III-ի լաբիրինթոս

Եգիպտոսը ողջ աշխարհին հայտնի է իր բուրգերով, սակայն հնագետներն առավել արտասովոր երևույթ են այնտեղ հայտնաբերել՝ լաբիրինթոս։ Վերջինս կառուցվել է Ամենեմհեթ III փարավոի օրոք և իրական գլուխգործոց է համարվում։ Զբաղեցնում է 70,000 քմ տարածք։ Լաբիրինթոսը հայտնաբերվել է 2008 թ. տարածքի ուսումնասիրման ժամանակ։ Գետնի տակ նկատվել է հսկայական չափսերի կառույց, որը միանում էր Ամենեմհեթ III-ի բուրգին։

Ըստ գիտնականների տվյալների՝ լաբիրինթոսը ծառայել է որպես փարավոնների գերեզման։ Այնտեղ թաղել են նաև կոկորդիլոսների, որոնք սուրբ կենդանիներ էին համարվում։ Սակայն կան վկայություններ այն մաիսն, որ լաբիրինթոսը նաև վանական համալիրի կենտրոն է եղել, որտեղ զոհեր են մատուցել եգիպտական բոլոր աստվածներին։ Լաբիրինթոս մուտք գործել թույլատրվում էր բացառիկ անձանց։

Ցավոք, ժամանակը չի խնայել լաբիրինթոսը, և այն ավիրվել է։ Պատմաբանները որոշ աղբյուրներից տեղյակ էին լաբիրինթոսի մասին, և այժմ արդեն ապացույցներ ունեն դրա գոյության վերաբերյալ։

Իերիհոնի լաբիրինթոս

Սա քրիստոնեության ամենահանելուկային խորհրդանիշերից մեկն է։ Համաձայն որոշ հնագույն գրավոր աղբյուրների՝ գոյություն է ունեցել Իերիհոն քաղաք, որն իրենից յոթնամաս լաբիրինթոս էր ներկայացնում։ Հնարավոր է, որ այն առնչություն ունի Իերիհոնի պատերի փլուզման աստվածաշնչյան պատմության հետ։ Դա տեղի է ունեցել այն բանից հետո, երբ հրեաների զորքը 7 անգամ անցել է քաղաքով։

Համաձայն բազմաթիվ հունական ձեռագրերի՝ այս լաբիրինթոսն ստեղծել է Սողոմոն արքան, սակայն թե ինչու՝ դեռևս անհայտ է։ Ի սկզբանե այն ունեցել է քառակուսի տեսք, ապա վերածվել շրջանաձևի։

Շարտրի տաճարի լաբիրինթոս

Ֆրանսիական Շարտր քաղաքում է գտնվում Նոտր-Դամ-դը-Շարտր տաճարը, որն ամենագեղեցիկ գոթական կառույցներից մեկն է համարվում։ Դրանում նաև կհանդիպեք արտասովոր լաբիրինթոսի, որը հենց հատակի վրա է պատկերված։

Հոգևորականները երկրպագում են լաբիրինթոսը և անցնում դրա միջով։ Սակայն հայտնի չէ՝ հստակորեն ով և ինչու է այն ստեղծել։ Տարածքում նախկինում բնակվող դրուիդները հավատում էին, որ իրենց հողն ու ջուրը սուրբ էներգետիկա ունի, իսկ այժմ համարվում է, որ մարդը, անցնելով տվյալ լաբիրինթոսով, բուժվում է և վարակվում այդ էներգետիկայով։ Լաբիրինթոսը կառուցված է հնագույն քարերից և ունի շուրջ 300 մ երկարություն։