Փաշինյանն անդրադարձավ կորոնավիրուսի դեմ պայքարը ձախողելու մեղադրանքներին
20:51 , 20 հունվար, 2021Armenpress.am-ը գրում է․
ՀՀ վարչապետ Նիկոլ Փաշինյանն, արձագանքելով կորոնավիրուսի դեմ պայքարը ձախողելու վերաբերյալ մեղադրանքներին, նշեց, որ պետք է հստակեցնել, թե այդ պնդումն անելիս, Հայաստանը ո՞ր երկրի հետ է համեմատվում: «Արմենպրես»-ի փոխանցմամբ՝ այս մասին Փաշինյանն ասաց Ազգային ժողովում կառավարության հետ հարցուպատասխանի ընթացքում, պատասխանելով ԱԺ փոխխոսնակ Ալեն Սիմոնյանի հարցին:
«Աշխարհում միլիոնավոր մարդիկ արդեն մահացել են կորոնավիրուսից, ամեն օր տասնյակ հազարավոր մարդիկ մահանում են: Առաջ, երբ մեղադրանք էր հնչեցվում, որ Հայաստանը ձախողել է կորոնավիրուսի դեմ պայքարը, բերվում էր կոնկրետ երկրի օրինակ, նշելով, որ այդ երկրում դեպքերը քիչ են: Հիմա, երբ այդ երկիրն իր թվերով մեզ անցել է, ոչ ոք այդ մասին չի խոսում, նշելով, որ ՀՀ կառավարությունը ճիշտ էր, որ այդ հարցը մեկ օրում լուծելու հարց չէր»,- ասաց Փաշինյանը:
Հայաստանում հաստատվել է կորոնավիրուսի 165 հազար 221 դեպք: Վարակի հետևանքով մահացել է 3016 մարդ, առողջացել՝ 153 հազար 857 հոգի: