«Մեր երկիրը կորոնավիրուսի երկրորդ ալիքին շատ ավելի լավ էր պատրաստված». Նիկոլ Փաշինյան

Այսօր կառավարության հերթական նիստին Առողջապահության նախարար Արսեն Թորոսյանը, անդրադառնալով կորոնավիրուսի դեպքերին, ասաց, որ այսօր առավոտվա տվյալներով երեք օրվա մեջ ունեցել ենք կորոնավիրուսի 702 դեպք: «Մոտ երկու շաբաթ է՝ որևէ պացիենտ չունենք, որ տանը սպասում է բուժօգնության: Մենք սկսել ենք որոշ հիվանդանոցներ վերադարձնել բնականոն գործունեությանը, այդ տրամաբանությամբ հետևում ենք զարգացումներին, կոչ ենք անում հակահամաճարակային կանոնները պահպանել»,- ասաց նա:

Նաև նշեց, որ հիմա մարդիկ ավելի քիչ են օդափոխում սենյակները, և ռիսկը մեծ է, հավելյալ ջանքեր պետք                է գործադրել:

Նիկոլ Փաշինյանն ընդգծեց, որ մեր երկիրը կորոնավիրուսի երկրորդ ալիքին շատ ավելի լավ էր պատրաստված: Առաջին ալիքի ժամանակ շատ էին հնչում քննադատություններ, որոնց մեծ մասը քաղաքականացված էր, որ մեզ ի ցույց էին դնում այլ օրինակներ, թե տեսեք՝ որքան վատ են կառավարվում կորոնավիրուսի դեպքերը Հայաստանում, բայց մեր կանխատեսումն  իրականություն դարձավ, որ երկրները լինելու են նույն իրավիճակում, և դա ընդամենը ժամանակացույցի հարց է»,- ասաց նա:

Առողջապահության նախարարը տեղեկացրեց նաև, որ ՀՀ-ում մահացության տոկոսը շատ ցածր է՝ մեկ ու կես տոկոսի շրջանակում է տատանվում, իսկ մեզանից շատ ավելի զարգացած երկրներում այդ թիվը տատանվել է մինչև տասը տոկոսի շրջանակում:

«Նույնիսկ վատ ժամանակներում երկու տոկոսից չի անցել մեզ մոտ մահացության ցուցանիշը»,- ասաց նա: