«Հայաստանում ընդդիմությունը պահանջում է վարչապետի հրաժարականը Ադրբեջանի հետ կնքված համաձայնության կապակցությամբ». The Washington Post

The Washington Post պարբերականը գրում է.

«Հազարավոր ցուցարարներ չորեքշաբթի երթեր են կազմակերպել Հայաստանի մայրաքաղաքում՝ շարունակելով պահանջել պետության վարչապետից հրաժարական տալ հարևան Ադրբեջանի հետ կնքած խաղաղության համաձայնության կապակցությամբ։ Ժողովուրդն այն համարում է ազգային շահերի դավաճանություն։

Ռուսաստանի միջնորդությամբ համաձայնությունը ձեռք է բերվել նոյեմբերի 10-ին՝ Լեռնային Ղարաբաղում 44 օր տևած պատերազմից հետո, որի ընթացքում ադրբեջանական զորքերը հաղթեցին հայկական ուժերին և տարածքներ գրավեցին։

Հայաստանի վարչապետ Նիկոլ Փաշինյանը համաձայնությունը համարել է ցավոտ, սակայն անհրաժեշտ քայլ՝ կանխելու համար Ադրբեջանի կողմից ողջ Լեռնային Ղարաբաղի գրավումը։

4000 ցուցարար Երևանի փողոցներում երթ է կազմակերպել՝ բղավելով՝ «Նիկո՛լ, դավաճա՛ն», «Նիկո՛լ, հեռացի՛ր»։ Երեքշաբթի ցույցերի ընթացքում ոստիկաները բերման են ենթարկել մի քանի ցուցարարների, սակայն ծավալուն գործողություներ չեն իրականացրել։

Խաղաղության համաձայնագիրը, որը Փաշինյանը ստորագրել է, թույլ է տվել Ադրբեջանին վերցնել Լեռնային Ղարաբաղի նշանակալի հատվածը։ Երեքշաբթի Ադրբեջանը նաև իր վերահսկողության տակ է առել Լաչինի շրջանը, որը գտնվում է Լեռնային Ղարաբաղի և Հայաստանի միջև։

Ռուսաստանը մոտ 2,000 խաղաղապահ է առնվազն հինգ տարով տեղակայել շրջանում, որոնք կվերահսկեն խաղաղությունն ու կհեշտացնեն անձանց դուրսբերումը տարածքից, կապահովեն Լաչինի շրջանով Լեռնային Ղարաբաղի և Հայաստանի կապը։

Չորեքշաբթի Հավաքական անվտանգության պայմանագրի կազմակերպության անդամ պետությունների այն ղեկավարների հետ տեսազանգի ընթացքում, որոնք համաձայնության կողմեր են հանդիսանում, Ռուսաստանի նախագահ Վլադիմիր Պուտինը նշել է, որ Փաշինյանը կայացրել է «ցավոտ, սակայն անհրաժեշտ որոշում» հակամարտությունն ավարտելու համար։

Փաշինյանն իր հերթին շնորհակալություն է հայտնել Պուտինին խաղաղության հաստատմանը միջնորդելու համար։

Հայաստանում ընդդիմադիր ուժերի ղեկավարները Փաշինյանին են պատասխանատու համարում բանակցությունները տապալելու համար։

Խաղաղության համաձայնությունն Ադրբեջանն իր հաղթանակն է համարոմ։ Նախագահ Իլհամ Ալիևը չորեքշաբթի հայտարարել է նոր ազգային տոնի՝ հաղթանակի օրվա մասին։

Հայաստանի առողջապահության նախարարը հայտնել է, որ առնվազն 2718 հայ մարտիկ է զոհվել 44-օրա պատերազմում։ Ադրբեջանի կառավարությունը հայտնում է, որ 94 ադրբեջանցի քաղաքացի է սպանվել և ավելի քան 400-ը վիրավորվել է, սակայն, միաժամանակ, հրաժարվում է հայտնել զինվորականների կորուստների մասին»։