Մերի Մնջոյանի և Էրիկի փայլուն զուգերգը «Նոր Ալիք 2013»-ի մրցութային երկրորդ օրը. Տեսանյութ

1in.am-ը գրում է.

Լատվիական Յուրմալայում շարունակվում է երիտասարդ կատարողների «Նոր ալիք 2013» 12-րդ միջազգային մրցույթը:

Այսօր մրցութային երկրորդ օրն է՝ «Իմ երկրի հիթն է» խորագրով: Մասնակիցները կատարեցին իրենց երկրների հիթերից:

Մեր երկիրը ներկայացնող «Հայաստանի Ձայն» հեռուստանախագծի հաղթող Մերի Մնջոյանը Էրիկի հետ միասին հանդես եկան զուգերգով և կատարեցին Առնո Բաբաջանյանի «Твои следы» (Քո հետքերը) երգը: Մերին և Էրիկը փայլուն կատարեցին երգը, հանդիսատեսը երկար ժամանակ ծափահարում էր նրանց: Ի դեպ ժյուրիի անդամներից հայ երգիչների կատարումը 10 միավոր գնահատեց միայն Կոնստանտին Մելաձեն (առավելագույնը 11 միավորն է): Նրանք վաստակեցին 120 միավոր:

Ի դեպ, այս երգը Էրիկը կատարել է «Նոր ալիք 2011»-ի ժամանակ, որն էլ նրան հաջողություն է բերել

Նշենք, որ երեկ՝ մրցութային առաջին օրը Մերին կատարեց միջազգային հիթերից Սելին Դիոնի՝ All By Myself երգը: 

Հաղթանակի համար պայքարում են 11 երկրի 16 մասնակիցներ Հայաստանից, Վրաստանից, Ադրբեջանից, Վիետնամից, Գերմանիայից, Ինդոնեզիայից, Ղազախստանից, Ղրղզստանից, Կուբայից, Լատվիայից, Ռուսաստանից եւ Ուկրաինայից:

Հուլիսի 26-ին տեղի կունենա Լեոնիդ Ագուտինի ստեղծագործական երեկոն: Մրցութային վերջին համերգը կանցկացվի հուլիսի 27-ին, որը հայտարարված է պրեմիերայի օր: Հաջորդ օրն արդեն կանցկացվի գալլա համերգ և մրցանակաբաշխություն:

Ժյուրիի կազմում են Վալերի Մելաձեն, Վալերիան, Իգոր Կրուտոյը, Իգոր Մատվիենկոն, Իգոր Նիկոլաևը, Կոնստանտին Մելաձեն, Լայմա Վայկուլեն, Լեոնիդ Ագուտինը, Մաքսիմ Ֆադեևը, Տոտո Կուտունիոն, Յուրի Անտոնովը:

Երաժշտական այս փառատոնի գլխավոր նպատակը նոր տաղանդներ գտնելն է: