Մկները պանիր են սիրում, իսկ ուղտերը սապատներում ջուր են պահում. ամենատարածված միֆերը կենդանիների մասին

Ամեն տարի գիտնականները բացահայտում են բազմաթիվ նոր կենդանատեսակներ, սակայն անգամ այն կենդանիների մասին, որոնց հետ մարդկությունը հազարամյակներ շարունակ ապրում է կողք կողքի, մենք ամեն ինչ չէ, որ գիտենք: Կենդանիների մասին մի շարք միֆեր են պտտվում մարդկանց շրջանում, որոնք, սակայն, չեն համապատասխանում իրականությանը:

Կաթն օգտակար է կատուների համար

Իրականում կատվի կերի մեջ կաթ ավելացնելով մենք վնասում ենք մեր սիրելի տնային կենդանիներին, ինչպես և կաթնասունների մեծ մասին: Բանն այն է, որ տարիքի աճի հետ մեկտեղ նրանք դադարում են լակտոզա ընդունել: Մոտավորապես 3-4 ամսականում կատվի օրգանիզմում դադարում է այն ֆերմենտի արտադրությունը, որը լուծում է կաթնաշաքարը, հետևաբար օգտագործված կաթը մարսողական խնդիրներ է առաջացնում:

Մկները պանիր են սիրում

Բնական միջավայրում կրծողներին պանիր չի հանդիպում, և նրանք էվոլյուցիայի են ենթարկվում այնպիսի պայմաններում, որտեղ անգամ պանրի նմանվող սնունդ չեն ընդունում: Իրականում մկները նախընտրում են մեծ քանակությամբ ածխաջրեր պարունակող սնունդ, օրինակ՝ հատիկեղեն և մրգեր: Մի քանի անգամ իրականացված փորձերը ցույց են տվել, որ նրանք կտրականապես հրաժարվում են պանրից:

Խլուրդները կույր են

Գետնի տակ ապրող այս կենդանիներն ունեն աչքեր, չնայած որ դրանք շատ փոքր են և ունեն 1-2 մմ տրամագիծ: Աչքերի օգնությամբ խլուրդները կարողանում են տարբերակել մի քանի գույն, տեսնել շարժվող օբյեկտներն ու արձագանքել լուսավորության փոփոխությանը: Այս ամենն օգնում է նրանց կողմնորոշվել տարածության մեջ, ինչպես նաև նկատել շարժվող որսն ու գիշատիչներին:

Ուղտերը ջուրը սապատների մեջ են պահում

Ուղտերն իրենց սապատների մեջ, բնականաբար, ոչ թե ջուր, այլ ճարպ են պահում: Ճարպի հավաքված պաշարը անապատի այս բնակիչներին թույլ է տալիս առանց սննդի գոյատևել մինչև 14 օր: Արտակարգ պայմաններում ճարպը քայքայվում է՝ ապահովելով օրգանիզմին օգտակար սննդանյութերով, հետևաբար նաև չափերով փոքրանում են սապատները: Առանց ջրի ապրել ուղտերին օգնում են այլ առանձնահատկություններ. այս յուրօրինակ արարածներն ունակ են նվազագույնի հասցնելու խոնավության կորուստը և դիմացկուն են ջրազրկման հանդեպ: Նրանք հանգիստ կերպով տանում են 30-40% հեղուկի կորուստը:

Ջայլամները վախից թաքցնում են գլուխներն ավազի մեջ

Այս միֆն այնքան խորն արմատներ ունի մարդկանց մտածողության մեջ, որ անգամ արտահայտություն գոյություն ունի՝ «ջայլամի քաղաքականություն»: Սակայն իրականում ոչ ոք երբևէ չի տեսել, թե ինչպես է ջայլամը գլուխն ավազի մեջ թաքցնում: Վտանգի պահին թռչունը պարզապես վազում է մինչև 70 կմ/ժ արագությամբ: Դա շատ ավելի արդյունավետ է, քան գլուխն ավազի մեջ թաքցնելը: Խոնարհվելով ջայլամները պարզապես հանգստացնում են ուսերի մկանները և գետնից փոքրիկ քարեր հավաքում, որոնք օգնում են նրանց մարսել սնունդը: