Խորհուրդ եմ տալիս հերթական անգամ Նիկոլ Փաշինյանին որևէ բան խոսելուց առաջ փաստերին ծանոթանալ

Նիկոլ Փաշինյանն այսօր հայտարարեց, թե կորոնավիրուսի դեմ պայքարում Հայաստանի ցուցանիշները շատ ավելի լավն են, քան աշխարհի զարգացած մի շարք երկրներինը: Նման պնդումներ անելու համար նախ պետք է արվեն հիմնավոր վերլուծություններ՝ համադրելով բազմաթիվ գործոններ, որոնք, վստահ եմ՝ չի արվել և Նիկոլ Փաշինյանը հերթական անգամ սուտ ասաց:

Հայաստանի բնակչության 0,47 տոկոսն, ըստ պաշտոնական տվյալների, վարակված է կորոնավիրուսով, մահվան տոկոսը կազմում է 1,60:

Հաշվի առնելով այն փաստը, որ Հայաստանի բնակչությունը հիմնականում կենտրոնացած է 3 քաղաքներում, ինչպես նաև այն, որ Հայաստանն ունի ընդամենը 2 բաց սահման, այս ցուցանիշն աննախադեպ բարձր է: Հայաստանն, ի տարբերություն այլ երկրների, ի սկզբանե ունեցել է հնարավորություններ կանխելու կորոնավիրուսի լայն թափով տարածումն, ինչի չի արվել, իսկ ներկայումս էլ մարդկանց չթեստավորելով, հիվանդանոցներ չտանելով, փորձ է արվում հնարավորինս թաքցնել վարակակիրների իրական թիվը: Նույն Նիկոլ Փաշինյանն օրեր առաջ հայտարարեց, թե հիմնվելով տվյալագիտական վերլուծության վրա, Հայաստանում այս պահին կա 100 000-ից ավել վարակակիր, իսկ դա նշանակում է, որ իր իսկ խոսքերով այս պահին կորոնավիրուսով վարակված է բնակչության 3,37 տոկոսն, ինչն էականորեն բարձր է այս պահին առաջին հորիզոնականում գտնվող ԱՄՆ-ից՝ վարակված է բնակչության 0,61 տոկոսը, Բրազիլիայից՝ 0,34 տոկոս, և ՌԴ-ից ՝ 0,33 տոկոսը: