Արցախի արդարադատության նախարարի օգնականն աշխատանքից ազատման դիմում է ներկայացրել

23:09 , 5 հունիս, 2020
Արցախի Հանրապետության արդարադատության նախարարի օգնական Մոնթե Մադոյանը ֆեյսբուքյան իր էջում գրառում է կատարել, որով տեղեկացնում է, որ շուրջ 3 տարի աշխատելուց հետո այսօր աշխատանքից ազատման դիմում է ներկայացրել։

«ԱՀ արդարադատության նախարարի օգնականի պաշտոնում շուրջ 3 տարի աշխատելուց հետո այսօր ազատման դիմում ներկայացրեցի։

Ինչպես գիտեք, նախագահի հրամանագրով նշանակվել է արդարադատության նոր նախարար և ես, որպես արդեն նախկին նախարարի օգնական, քաղաքական ուժերի հարաբերակցության փոփոխություններով պայմանավորված, ազատման դիմում եմ ներկայացրել։

Աշխատանքի էի անցել բավականին երիտասարդ տարիքում, որի արդյունքում ձեռք եմ բերել զգալի փորձ իրավունքի և պետական կառավարման ոլորտներում։

Ցանկանում եմ շնորհակալություն հայտնել իմ բոլոր այն գործընկերներին, ովքեր այս տարիների ընթացքում օգնել են ինձ գործում, ում հետ համատեղ աշխատանքի արդյունքում կարողացել ենք թեկուզ մի փոքր լավ բան անել մեր քաղաքացիների համար»: