Հրաչյա Հակոբյանը շնորհակալության է արժանի, որ այդպես ի ցույց է դնում այն թշվառամիտ վիճակը, որ առկա է թավշյա իշխանության վերին էշելոններում


14:55 , 17 հունվար, 2020

Տնաշեն, մտածիր, նոր խոսիր...

Չնայած, չէ՛, ավելի լավ է լռես: Խոսքն, ինչ խոսք, իշխող ընտանիքի (այլևս սա խայտառակ իրողություն է) ներկայացուցիչ, ԱԺ պատգամավոր Հրաչյա Հակոբյանի հայտարարությունների մասին է՝ նախ՝ «Ֆակտոր»-ին, իսկ երեկ էլ «ԱրմՆյուզ»-ին տված հարցազրույցներում ԱԱԾ նախկին տնօրեն Արթուր Վանեցյանի կողմից պետական հեղաշրջում իրականացնելու մտադրության և նախապատրաստման թեմայով:

Մի քանի օր առաջ Հրաչյա Հակոբյանը, հղում անելով ընտանեկան թերթոնի տպած, բերիայական դանոսաոճով շարադրված մարազմատիկ հրապարակմանը, գրեթե պնդում էր, որ ԱԱԾ նախկին տնօրենը հեղաշրջում էր նախապատրաստում: Երկրորդ հարցազրույցում արդեն ասում է, թե հեղաշրջում նախապատրաստելու պահը զուտ իր ենթադրությունն է:

Դա քաղաքական գործչի համար ինքնաոչնչացնող հայտարարություն է: Չնայած Հրաչյա Հակոբյանից ի՞նչ քաղաքական գործիչ: Վարչապետի կնոջ եղբայր լինելու համար ԱԺ դեպուտատի մանդատ ունենալը չի նշանակում, որ նա առհասարակ ինքն իրենով քաղաքականության մեջ ինչ-որ բան ներկայացնում է:

Ցանկացած դեպքում Հրաչյա Հակոբյանը շնորհակալության է արժանի (առանց հեգնանքի, ի դեպ), որ այդպես բացահայտ, նույնիսկ Նիկոլի պաշտամունքով տառապող սուբյեկտների համար ակնհայտ ի ցույց է դնում այն խեղկատակ ու թշվառամիտ վիճակը, որ առկա է թավշյա իշխանության վերին էշելոններում:

Ենթադրություն, ասում է: Ու զուտ ենթադրությունից ելնելով՝ հարձակվում են տարբեր անձանց վրա (գուցե նրանց հասնում է, բայց հարցը արդեն կոնկրետ անձերը չեն):

Բա որ ձեր մասին ենթադրությունները ցփնեն երեսներիդ...

Անձը իրեն ոչ մի կերպ հաշիվ չի տալիս, թե ով է, ինչ կարգավիճակ ունի, ինչ է խոսում, դա ինչ հետևանքներ կարող է ունենալ: Հենց գիտի, թե իր մասնակցույթամբ նկարվող էժանագին ու տափակ «կինոներից» մեկի մեջ է:

Թե բա՝ իշխող ընտանիքի դեմ հակաքարոզչական արշավ է իրականացվել կամ իրականացվում: Ավելի անմիտ բան դժվար է մոգոնել, որովհետև ով կամ ինչու պետք է հատուկ բան մտածի մեկի դեմ, ով ցանկացածի մտածածից ավելի արդյունավետ է ինքնավարկաբեկվում: