Նոր Հաճնում տատիկի և 4 թոռների մահվան պատճառ դարձած պատահարի քննության համար հանձնաժողով է ստեղծվել
13:22 , 27 նոյեմբեր, 2019ՀՀ վարչապետ Նիկոլ Փաշինյանի որոշմամբ՝ Նոր Հաճն քաղաքի Իսահակյան փողոցի 2-րդ շենքի 11 բնակարանում տեղի ունեցած պատահարի քննությունն իրականացնելու նպատակով հանձնաժողով է ստեղծվել։
Պատահարի քննության ավարտից հետո հանձնաժողովի նախագահը պետք է Հայաստանի Հանրապետության վարչապետին ներկայացնի տեղեկատվություն քննության արդյունքների մասին:
Հանձնաժողովի կազմում կլինեն հինգ հոգի. հանձնաժողովը կնախագահի քաղաքաշինության, տեխնիկական և հրդեհային անվտանգության տեսչական մարմնի ղեկավարը։
Հիշեցնենք՝ Կոտայքի մարզում նոյեմբերի 16-ին ողբերգական դեպք էր տեղի ունեցել. ժամը 13։00-ի սահմանում ոստիկանության Կոտայքի մարզային վարչություն ահազանգ էր ստացվել, որ Աբովյանի բժիշկների հերթապահ խումբը կանչով մեկնել է Նոր Հաճն քաղաքի Իսահակյան փողոցի 2-րդ շենքի 11 բնակարան, որտեղ հայտնաբերել է տատիկի ու չորս թոռների դիերը։
Պարզվել էր, որ տան բնակիչները թունավորվել են շմոլ գազից։