«Եթե նախկինում խոսքը, ասենք, 100 մլն դրամի մասին էր, հիմա արդեն մենք խոսում ենք միլիարդների անարդյունավետ ծախսերի մասին». Դավիթ Խաժակյան (Video)


22:45 , 19 նոյեմբեր, 2019

168.am-ը գրում է․

«2015թ. Երևան քաղաքի բյուջեի դեֆիցիտը 250 միլիոն դրամ էր, 2016թ.՝ 150 մլն, 2017թ.՝  68 մլն, 2018թ.՝ 48 մլն, և արդեն գալիս է 2019-20թթ.՝ 8.5 մլրդ կազմում է 2019թ. բյուջեի դեֆիցիտը, և 2020թ. նախատեսվում է 9.1 մլրդ դրամ»,- «168 TV» «Ռեվյու» հաղորդման ընթացքում այս մասին ասաց Երևանի ավագանու «Լույս» խմբակցության ղեկավար Դավիթ Խաժակյանը՝ ընդգծելով՝ դա աննախադեպ մեծ ցուցանիշ է:

«Դրա հիմքերը շատ ավելի վատն են, քան կարելի է պատկերացնել: Այս թիվը պայմանավորված է նախորդ տարվա չկատարված ծախսերով, որը կոչվում է տարեսկզբի ազատ մնացորդ, սրանք այն ծախսերն էին, որոնք նախորդ տարի պետք է իրականացվեին՝ ասֆալտապատում, բարեկարգում, մանկապարտեզների վերանորոգում, տարբեր քաղաքային տնտեսության վրա ծախսեր, բայց դրանք չեն իրականացվել, այդ մրցույթների մի մասը չի հայտարարվել, և գոյացել է ահռելի մեծ գումար: Ընթացիկ աշխատանքներն ադմինիստրացիան չի կատարել»,- ասաց նա:

Դավիթ Խաժակյանը նկատեց՝ միայն մեկ-երկու շաբաթ առաջ էր, որ Երևանի քաղաքապետ Հայկ Մարությանը բացեց իր առաջին և այս տարվա համար նախատեսված միակ բարեկարգած այգին.

«Մի շարք աշխատանքներ չեն իրականացվել: Ուստի, այս մասով դիֆիցիտն աննախադեպ մեծ է, և ընդ որում՝ մի կարևոր ցուցանիշ ևս՝ նախորդ տարվա 2019թ. չկատարված ծախսերն ավելի մեծ են, քան 2018թ.: Իսկ դա այն անցումային շրջանն էր, երբ քաղաքային իշխանություն փոխվեց, և այդ ընթացքում ազատ մնացորդը գուցե ընդունելի լիներ, որովհետև երբ չկա քաղաքային իշխանություն, գուցե ծախսեր կան, որոնք չիրականացվեն: Բայց դա չի իրականացվում արդեն 2019թ., երբ սկզբից մինչև վերջ նոր քաղաքապետն է պաշտոնավարում, այն էլ՝ մի քաղաքապետ, որը սարեր էր խոստանում»:

Նա նշեց, որ աշխատավարձային ֆոնդի հետ կապված պարզաբանում են ստացել, թե այդ թիվը նաև ներառում է աղբահանության հիմնարկի աշխատավարձերը, և գումարի առումով դա, ըստ նրա՝ կազմում է ընդհանուր սեփական եկամուտների ֆոնդի 39.5 տոկոսը. «2018թ. դա կազմել է 29 տոկոս, իսկ 2019թ.՝ 32 տոկոս, տեսեք՝ ինչ աճ են արձանագրել, և սա նաև պայմանավորված է այս պարգևավճարների մեծ աճով, որովհետև նախորդ տարի եկան և 700 մլն դրամի պարգևավճարների ֆոնդը հասցրեցին 1 մլրդ 900 մլն դրամի»:

Պարգևավճարների մասով բերված փաստարկները, Դավիթ Խաժակյանի խոսքով՝ համոզիչ կլինեին, եթե ականատես լինեինք ավելի լավ աշխատանքի կամ աշխատակիցների մոտիվացվածության. «Բայց աշխատավարձային ֆոնդը երկար ժամանակահատված պահեցին նույն մակարդակի վրա, փորձ արեցին բարձրացնել և այնպիսի նախագիծ բերեցին, որն անհավասար և անարդար բաշխում էր ենթադրում, և աշխատակիցների մոտ ձևավորվեց ակնկալիք, որը հասկանալի երևույթ է, որ աշխատավարձերը պետք է բարձրացվեն: Բայց դա տեղի չունեցավ, և փոխարենը՝ որոշեցին, որ պետք է եռամսյակային պարգևատրումներ հատկացնել: Մեկ տարի շարունակ մենք ասում էինք, որ ավելի ճիշտ կլինի վերանայել աշխատավարձերը պարգևատրումների ֆոնդի հաշվին, և լրացուցիչ միջոցներ չներգրավել, բայց իրենք կարծես թե հակված են առաջիկայում և՛ աշխատավարձերը բարձրացնել, և՛ պարգևատրումների ֆոնդը պահպանել:

Հասկանալի է, որ մենք ևս ցանկանում ենք, որ մեր քաղաքապետարանի աշխատակիցները լավ վարձատրվեն, և դրա վերաբերյալ առաջարկներ ներկայացրել ենք քաղաքապետին: Բայց կարևոր թիվ պետք է հնչեցնեմ, որ ասվում է՝ 107 մլրդ դրամ է քաղաքային բյուջեն, դա վերաբերում է նաև պատվիրակված լիազորություններին՝ դպրոցների, պոլիկլինիկաների աշխատավարձերին, որոնք պատվիրակվում են կառավարության կողմից:

Այդ գումարը տրամադրում է կառավարությունը: Եվ որպես սեփական եկամուտ՝ մենք կարող ենք հաշվել միայն 26.9 մլրդ դրամը: Այսինքն՝ երբ այս գումարի արդեն 40 տոկոսը վերածվում է աշխատավարձային ֆոնդերի, ադմինիստրացիայի պահպանման, նշանակում է՝ մենք քաղաքի վրա լրացուցիչ ծախսեր չենք կարողանում անել կամ ավելի քիչ ենք անում: Ստացվում է, որ հարկատուները վճարում են, իսկ ադմինիստրացիան փոխանակ ավելի շատ աշխատանք կատարի՝ իր վրա ավելի շատ գումար է ծախսում»:

Դ. Խաժակյանն անդրադարձավ նաև Երևան քաղաքի 5-ամյա զարգացման ծրագրին՝ հիշեցնելով Հայկ Մարությանը նախընտրական խոստումները, թե փոխվելու են բոլոր վերելակները. «Հիմա տեսնում ենք, որ 5-ամյա զարգացման ծրագրից ընդհանրապես այդ բարեփոխումը հանել են, և 5-ամյա զարգացման ծրագրով, այսինքն՝ մինչև Հայկ Մարությանի պաշտոնավարման ավարտը, խոստանում են 0 նոր վերելակ: Պատվիրեցին 20 վերելակ՝ բոլոր վարչական շրջանների համար, որը, ըստ էության, օվկիանոսի մեջ կաթիլ է, և ասացին՝ դրանով կբավարարվենք: Ընթացիկ պահպանման ծախսերը, ինչպես նախկինում արվել էր, այդպես էլ շարունակելու է արվել»:

Խոսելով մայրաքաղաքի աղբահանության և սանիտարական մաքրման հարցերի մասին, Դավիթ Խաժակյանն ասաց, որ համայնքային հիմնարկը լավ թե վատ աղբահանությունը կազմակերպում է, բայց, ըստ նրա՝ սանիտարական մաքրման խնդիր կա. «Քննարկման էր դրված, թե ինչ միջոցներ պետք է հատկացնել այս հիմնարկին, արդյո՞ք այն կկարողանա գոնե նույն արժեքով իրականացնել ծառայության մատուցումը, ինչ անում էր մասնավոր կազմակերպությունը: Մենք տեսնում ենք, որ աղբահանության վրա իրականացվող ծախսերն էապես աճել են, որակն էլ, դժվար է ասել, որ շատ ավելի է բարձրացել:

Ընդ որում, այն մեքենաների շարժակազմը, որ հիմա է շահագործվում, իր պահպանման ծախսերով շատ ավելի էժան պետք է նստեր, քան այն, ինչ սպասարկում էր «ՍանիՏեքը»:

Հիմա այդ ինչպե՞ս են արել, որ այդ աղբահանության հիմնարկի ծախսերը մեր միջին գնահատումներով 6 մլրդ դրամը գերազանցում է՝ նախկին 5.2 մլրդ դրամի նկատմամբ: Դա պետք է ուսումնասիրել, որովհետև բացվածքն այդպես էլ մեզ չեն տրամադրում: Արդյունքում՝ ստացվեց, որ մենք ստեղծեցինք մի հիմնարկ, որը գործում է անարդյունավետ, տանում է շատ գումար և չի մատուցում այն ծառայությունը, որից նույնիսկ իրենք լիովին գոհ չեն, ասում են՝ դե, էն չէ: Իսկ քաղաքում երբևէ 50 և ավելի մեքենա չի շահագործվել աղբահանության համար: Նշանակում է, որ իրենք աշխատանքը կազմակերպել են վատ կերպով»:

Դիտարկմանը՝ Դավիթ Խաժակյանն ու իր գործընկերները նախկինում քննադատում էին Տարոն Մարգարյանին, բայց հիմա էլ Հայկ Մարությանին են քննադատում և նշում, թե նախկինի համեմատ՝ ավելի անարդյունավետ է կառավարում, նա այսպես արձագանքեց. «Ես Տարոն Մարգարյանի ժամանակ ասում էի, որ քաղաքապետարանի աշխատակազմն ուռճացված է, հաստիքացուցակների քանակը մեծ է:

Հայկ Մարությանն եկավ ու է՛լ ավելի այն մեծացրեց: Մենք ասում էինք, որ ներկայացուցչական ծախսերը շատ են, և իսկապես շատ էին, բայց խոսքը, ասենք, 100 մլն դրամի մասին էր, հիմա մենք արդեն խոսում ենք միլիարդների անարդյունավետ ծախսերի մասին: Կառավարումը պետք է լինի և՛ արդյունավետ, և՛ թափանցիկ. արդյունավետության մասով մենք ունենք հետընթաց, թափանցիկության մասով ևս որոշակի առումով ունենք հետընթաց, որովհետև հիմա բաներ են քննարկում, որոնց մասին հանրությանը և մեզ չեն իրազեկում, ինչը շատ վատ երևույթ է»:

Մանրամասները՝ 168.am-ի տեսանյութում