Բրիտանական բառարանն անվանել է տարվա բառակապակցությունը


20:00 , 7 նոյեմբեր, 2019

Քոլինզի անգլերեն բացատրական բառարանը climate strike («կլիմայական գործադուլ») անվանել է տարվա բառակապակցություն. այն ամենից հաճախ են օգտագործել մեր մոլորակի բնակիչները, նվազագույնը նրանք, ովքեր մուտք ունեն սոցցանցեր: Այդ մասին հայտնում է Mirror-ը:

Մասնագետների տվյալների համաձայն, այս բառակապակցությունն առաջին անգամ հնչել է 2015-ին Փարիզում կայացած Կլիմայի փոփոխության համաշխարհային համաժողովում և այդ ժամանակից ի վեր ավելի հաճախ է օգտագործվել: Օրինակ, 2019-ին այն հարյուր անգամ ավելի հաճախ է օգտագործվել, քան մեկ տարի առաջ:

Բառարանում ավելացվել են նաև նոր բառեր, օրինակ՝ rewilding, ինչը բառացի թարգմանությամբ նշանակում է «նորից վայրիացում»՝ կենդանիների վերադարձը իրենց սկզբնական բնակության արեալ, որտեղ նրանք նախկինում ամբողջովին ոչնչացվել են մարդու կողմից:

Բացի այդ՝ ավելացվել է influencer տերմինը՝ մարդ, որի կարծիքն ազդում է որոշակի լսարանի վրա, ինչպես նաև hopepunk-ը՝ հեռուստատեսային ժանր, որի էությունը դրական օրակարգ ու լավատեսության մթնոլորտ ստեղծելն է: