Օբաման Աֆրիկայում Չինաստանի գործողություններում երկարաժամկետ զարգացման հիմքեր չի տեսնում

ԱՄՆ նախագահ Բարաք Օբաման ոչինչ չունի Աֆրիկայում Չինաստանի առաջատարության դեմ, սակայն կարծում է, որ Չինաստանը Սև մայրցամաքի երկարաժամկետ զարգացման համար հիմքեր չի ստեղծի, այլ միայն այնտեղից դուրս կբերի բնական ռեսուրսները: Այս մասին հայտնում է ITAR-TASS-ը:

«Չինաստանի հիմնական հետաքրքրությունն Աֆրիկայի բնական ռեսուրսները հասանելի դարձնելու մեջ է՝ արտահանման վրա կողմնորոշված իր տնտեսությունը խթանելու նպատակով։ Շատ հաճախ Աֆրիկան պարզապես կիրառվում է հումքի դուրս բերման, այլ ոչ թե աշխատատեղերի ստեղծման և երկարաժամկետ զարգացում ապահովելու համար»,- հայտարարել է Օբաման Սենեգալից ՀԱՀ թռիչքի ժամանակ: 

Նա ընդգծել է, որ շատ մարդիկ բավարարված են Աֆրիկայում Չինաստանի մասնակցությամբ: 2012-ին Աֆրիկայի հետ Չինաստանի ապրանքաշրջանառությունը հասել է 200 մլրդ դոլարի, և Չինաստանը դարձել է Աֆրիկայում գլխավոր ներդրողը: 

«Կարծում եմ՝ լավ է, որ Չինաստանը, Հնդկաստանը, Թուրքիան և այլ երկրներ մեծ ուշադրություն են դարձնում Աֆրիկային, սակայն այժմ «սառը պատերազմի» ժամանակները չեն, այլ առկա է մեկ գլոբալ շուկա»,- նշել է ԱՄՆ նախագահը: 

Աֆրիկայի քաղաքական գործիչները կարծում են, որ ԱՄՆ-ը զիջել է առաջատարությունը մայրցամաքում Չինաստանին, և Օբամայի շրջագայությունը դիտարկում են որպես այն վերականգնելու փորձ:

Ուրբաթ ուշ երեկոյան Օբամայի օդանավը վայրէջք է կատարել Պրետորիայի «Ուաթերքլուֆ» ռազմաբազայում: ԱՄՆ նախագահը կլինի նաև Յոհանեսբուրգում և Քեյփթաունում: