Հարգելի Սերժ Թանկյան, մենք չենք կարող մեզ թույլ տալ, որ Նոր Հայաստան կերտած հեղափոխականը չկատարի ժողովրդի վարչապետին տրված խոստումը

Հարգելի և շատ սիրելի Serj Tankian,
Դուք` որպես Նոր Հայաստան կերտած ակտիվ հեղափոխական, բնականաբար տեղյակ եք, որ Հայաստանում ոչ բռնի, ժողովրդական և թավշյա հեղափոխությունից հետո օլիգարխներ չկան, այլ կան ժողովրդի վարչապետի տիկնոջ հիմնադրամներին կանոնավոր կերպով մուծվող գործարար-սեփականատերեր, ովքեր երբեք կեղտոտ փողեր չեն աշխատել, չեն աշխատում և չեն աշխատելու համենայն դեպս այնքան ժամանակ, քանի դեռ կանոնավոր կերպով մուծվում եմ այդ հիմնադրամներին: Եվ, քանի որ Դուք ժողովրդի վարչապետին խոստացել եք բնակարան գնել և ավելի շատ ժամանակ անցկացնել Հայաստանում, ապա հուսով եմ, որ «Իմ քայլը» հիմնադրամի հարգարժան տնօրենի հետ հանդիպմանը չեք բարձրացրել հիմնադրամին գործարար-սեփականատերերի մուծված գումարներով Ձեզ Հայաստանում բնակարան նվիրելու հարցը:

Հավատացեք, այդ փողերն այլևս մաքուր փողեր են, և Ձեր տրամաչափի հեղափոխականին հարիր չէ ժողովրդի վարչապետին տրված խոստումն իրագործել այդ գումարներով: Եվ, եթե տրված խոստումը չեք կատարում միայն այն բանի համար, որ Ձեր «ձեռքը քարի տակ է», ապա կես բերան այդ մասին հայտարարեք: Խոստանում եմ, անձամբ դրամահավաք կկազմակերպեմ: Անշուշտ, մենք չենք կարող մեզ թույլ տալ, որ Նոր Հայաստան կերտած հեղափոխականը չկատարի ժողովրդի վարչապետին տրված խոստումն ու փաստացի սաբոտաժի ենթարկի Հայաստանում ոչ բռնի, ժողովրդական, թավշյա հեղափոխության հաղթական ընթացքը: