Զբոսաշրջիկներից առգրավված 10 տոննա ավազն ու քարերը Սարդինիայի լողափեր են վերադարձվել

Սարդինիայի լողափեր են վերադարձվել տասը տոննա ծովային ավազն ու քարերը, որոնք զբոսաշրջիկները տարիներ շարունակ փորձել են դուրս տանել տեղի նավահանգիստներից, հաղորդում է «ՌԻԱ Նովոստի»-ն։

Այս առումով զբոսաշրջիկներին չեն կանգնեցնում անգամ լուրջ տուգանքները։ Այսպես՝ նրանցից մեկին տուգանել են հազար եվրոյով, քանի որ փորձել է Սարդինիայից որպես հիշատակ մեկ շիշ ավազ տանել։

Տավոլարա հսկվող ծովային գոտու տնօրեն Աուգուստո Նավոնեի խոսքով՝ վերջերս նրանց զանգահարել են Օլբիի օդանավակայանից և առաջարկել տանել զբոսաշրջիկների ճամպրուկներից առգրավված քարերը, խեցիներն ու ավազը։ Խոսքը տարիներ շարունակ օդանավակայանի պահեստում կուտակված 10 տոննա ավազի ու քարերի մասին է։