Նորապսակները նվերների փոխարեն հյուրերին խնդրել են օգնել դպրոցին

Ամերիկյան Ֆլորիդա նահանգից նորապսակները որոշել են իրենց հարսանիքն արտասովոր ձեւով նշել․ նրանք հարսանիքին հրավիրված հյուրերին խնդրել են նվերների փոխարեն բերել դպրոցի համար անհրաժեշտ իրեր, հաղորդում է Fox News-ը։

Մեթ եւ Քելի Քեմերոններն իրենց ընկերներին եւ հարազատներին խնդրել են աջակցել 70 աշակերտ ունեցող դպրոցին:

«Մենք քիչ կարիքներ ունեինք, կարող էինք ձեռք բերել անհրաժեշտ ամեն ինչ։ Մենք սկսեցինք մտածել որեւէ բարեգործական նախաձեռնության մասին, եւ լինելով ուսուցիչ՝ ինձ շատ դուր եկավ դպրոցին օգնելու գաղափարը»,-պատմել է Քելին WTVT հեռուստաալիքին։

Նա յոթ տարի աշխատել էր որպես ուսուցիչ եւ պատկերացնում էր, թե ինչով կարելի է օգնել դպրոցին։ Եւ ահա հունիսին՝ Քելիի եւ Մեթի պսակադրության օրը, հյուրերից յուրաքանչյուրը նվերի փոխարեն բերել էր մեկական պայուսակ՝ դպրոցի եւ աշակերտների համար անհրաժեշտ իրերով։