Դիանա Գասպարյանը «թիրախավորել» է հիմնադրամը. Նիկոլ Փաշինյանին դիմում են ուշադրություն դարձնել քաղաքապետի ուղղորդվածության վրա

Armlur.am-ը գրում է.

«Ժողովուրդ» օրաթերթը զրուցել է «Արթուր Ասատրյան» հիմնադրամի հոգաբարձուների խորհրդի նախագահ Արտակ Սերգոյանի հետ: 

-Պարո՛ն Սերգոյան, Ձեր հիմնադրամը հունիսի 1-ին միջոցառում էր կազմակերպել, որը, կարելի է ասել, այդքան էլ անհարթ չի անցել. եղել են քաշքոցներ, իսկ Էջմիածնի քաղաքապետ Դիանա Գասպարյանը հայտարարել էր, որ կազմակերպիչները չէին իրազեկել նախապես քաղաքապետարանին, որի համար օրենքով սահմանված կարգով տուգանվելու են: Ի՞նչ է կատարվել իրականում: 

-Հունիսի 1-ին հիմնադրամը կազմակերպել է միջոցառում, որի բյուջեն եղել է 15 միլիոն դրամ: Միջոցառմանը եղել են հազարավոր խաղալիքներ, պաղպաղակներ, եղել է ուղղաթիռ, որը վերեւից հազար հատ գնդակներ է բաց թողել երեխաների ուղղությամբ: Չի կարելի ասել` եղել է հրմշտոց, հավաքվել է 7-8 հազար մարդ. երկու օր առաջ մենք տեղեկացրել էինք, որ լինելու է նման միջոցառում, հավաքվել են այդքան երեխաներ իրենց ծնողների հետ: Իսկ քանի որ երեխաներն իրենց բնավորությամբ անհամբեր են, ուզում էր ամեն մեկն առաջինը ստանար այդ նվերը, դա որակվեց որպես հրմշտոց: Մեր հիմնադրամի կայքում կա վիդեոհոլովակը, Դուք կարող եք տեսնել, թե իրականում ինչ է կատարվել: Բայց մեր քաղաքապետը դա որակեց հրմշտոց, հայտարարեց, թե դա արտոնագրված չի եղել: 

Բայց ես ասեմ, որ մենք բանավոր իրենց առաջարկել ենք, որ թույլ տան քաղաքապետարանի դիմացի այգում արվի միջոցառումը, բայց ասեցին` իրենք ունեն այդտեղ միջոցառում, ոստիկանությունից կապվեցին մեզ հետ ու ասեցին, որ Դիանան ասել է, որպեսզի թույլ չտանք այդտեղ որեւէ միջոցառում արվի: Մեզ քանի որ բանավոր մերժեցին, մենք այլեւս գրավոր չդիմեցինք: Մենք էլ Էջմիածնի հրապարակի հարակից տարածքում` սրճարանի տարածքում, որը մասնավոր է, մենք ստացանք իրենից թույլտվություն եւ կազմակերպեցինք մեր միջոցառումը: Իսկ միջոցառումն անցել է շատ բարձր տրամադրությամբ, որեւէ խնդիր չի եղել, որեւէ միջադեպ չի եղել բացարձակապես: 

Ամբողջական հոդվածը կարող եք կարդալ այստեղ