3.5 մլն եվրո արժողությամբ թանկարժեք ոսկերչական զարդերը Կաննի կինոփառատոն տեղափոխող կինը դրանք մոռացել է ինքնաթիռում: Այս մասին հաղորդել է France-Presse գործակալությունը՝ Նիցցայի ոստիկանությունից ստացված տեղեկությունների համաձայն:
Արտադրողի կողմից գովազդային նպատակով տրամադրված ոսկերչական զարդերը նախատեսված են եղել ալբանական ծագմամբ հայտնի բրիտանացի երգչուհի Ռիտա Օրայի համար: Նա կինոփառատոնի հյուրն էր: Սակայն դրանք տեղափոխող կինը զարդերով փոքրիկ ճամպրուկը մոռացել է Լոնդոնից Նիցցայի օդանավակայան ժամանած ինքնաթիռում: Սրահում նա մոռացել է նաև թանկարժեք մորթուց թիկնոցը:
Կինը հիշել է այդ մասին արդեն օդանավակայանից դուրս գալիս: Նա փորձել է վերադառնալ ինքնաթիռ, սակայն ֆրանսիական սահմանապահ ոստիկանները թույլ չեն տվել:
Ավիաընկերության աշխատակիցները գտածոն ետ են ուղարկել Լոնդոն, որտեղ այն վերադարձվել է արտադրող ընկերությանը, որը դրանք նորից ուղարկել է Կանն: