WhatsApp-ը վարակում է սմարթֆոնների օպերացիոն համակարգերը
18:00 , 22 մայիս, 2019WhatsApp ընկերությունը հաղորդում է, որ իր հավելվածների միջոցով լրտեսական ծրագիրը վնասում է սմարթֆոնների օպերացիոն համակարգերը, և դա ոչ մի կապ չունի հավելվածի անզգույշ օգտագործման հետ:
AP-ի փոխանցմամբ՝ WhatsApp-ի ներկայացուցիչը մայիսի 13-ին հայտարարել է, որ լրտեսական ծրագիրը կարողացել է սմարթֆոններ ներթափանցել հավելվածի ձայնային զանգի գործառույթի միջոցով, ընդ որում՝ բավական է նույնիսկ անհայտ օգտատիրոջ անպատասխան զանգը:
Ամերիկյան ընկերությունը կիբերհարձակումը հայտնաբերել է մայիս ամսվա սկզբին և հայտարարել է, որ անհայտ թվով WhatsApp-ով հեռախոսներ են վարակված վնասակար ծրագրով:
Բրիտանական The Financial Times պարբերականը որպես լրտեսական ծրագրի մշակող է անվանել իսրայելական NSO Group ընկերությանը:
WhatsApp-ի ներկայացուցիչը դա մեկնաբանել է. «Մենք չենք ժխտում որևէ տեղեկություն, որը դուք տեսել եք մամուլում»:
Ընկերությունը նաև հավելել է, որ արդեն տեղեկացրել է իրավապաշտպան կազմակերպություններին, թարմացում է թողարկել՝ ծրագրի անվտանգության «փոսը կարկատելու համար»: ԱՄՆ իշխանությունները հետաքննություն են սկսել: