Google-ը հրապարակել է «Եվրատեսիլ 2019» երգի մրցույթի եզրափակիչ փուլ անցած տասը մասնակցի անունները, որոնց վերջին շրջանում համակարգում ամենաշատն են որոնել, հաղորդում է Lenta.ru-ն՝ հղում անելով ընկերության մամլո ծառայությանը:
Ըստ աղբյուրի՝ ցանցի օգտատերերի կողմից ամենաորոնված արտիստը Ֆրանսիայի ներկայացուցիչ Բիլալ Ասսանին է: Երկրորդ տեղում իսլանդական «Հաթարի» խումբն է: Ռուսասռանը ներկայացնող Սերգեյ Լազարևը եզրափակում է առաջին եռյակը: Բացի այդ, օգտատերերը մեծ հետաքրքրություն են ցուցաբերել Նիդեռլանդների, Բելառուսի, Կիպրոսի, Շվեյցարիայի, Իտալիայի, Սան Մարինոյի և Շվեդիայի ներկայացուցիչների հանդեպ:
Նշվում է, որ Google-ը ճիշտ է կանխատեսել 2017 թվականի մրցույթի հաղթողին, իսկ 2018-ին «Եվրատեսիլ»-ում հաղթել է որոնողական համակարգի ներկայացրած ֆավորիտներից մեկը:
Նշենք, որ բուքմեյքերների կարծիքով՝ «Եվրատեսիլ 2019» երգի միջազգային մրցույթում, ամենայն հավանականությամբ, հաղթելու է Նիդեռլանդների ներկայացուցիչ Դունկան Լոուրենսը՝ Arcade երգով: Առաջին եռյակում, ըստ բուքմեյքերների, կլինեն նաև Շվեդիայի և Ֆրանսիայի ներկայացուցիչները: Սերգեյ Լազարևն, ըստ կանխատեսումների, չորրորդն է:
«Եվրատեսիլ 2019» մրցույթի եզրափակիչը կկայան մայիսի 18-ին, Թել Ավիվում: