Կառավարության կողմից այդպես էլ լուրջ քայլեր չարվեցին Հայաստանը զբոսաշրջության և ներդրումների համար գրավիչ դարձնելու ուղղությամբ

Մեկ տարի առաջ Նիկոլ Փաշինյանը և իր թիմը մարդկանց հույսեր էին ներշնչում, թե իրենց կատարած հեղափոխությունը դարձնելու են բրենդ, զբոսաշրջիկների մեծ հոսք է սպասվում, բազմաթիվ սփյուռքահայեր վերադառնալու են հայրենիք։

Անցավ մեկ տարի, սակայն զբոսաշրջության և հայրենադարձության ուղղությամբ դրական տեղաշարժեր տեսանելի չեն։ Ճիշտ է, Նիկոլ Փաշինյանն իր պաշտոնավարման ամփոփիչ ասուլիսում ներկայացրեց, թե զբոսաշրջիկների թիվն աճել է 10,5 տոկոսով, սակայն այդպես էլ չներկայացրեց, որ կրճատվել են Հայաստանում զբոսաշրջիկների կատարած ծախսերը։

Բացի այդ՝ իրանցի և այլ երկրների բազմաթիվ զբոսաշրջիկներ, որոնք նախկինում հետաքրքրություն ունեին մեր երկրի նկատմամբ, նախընտրում են գնալ Վրաստան։ Գոնե կարելի էր վրացական փորձը մեզ մոտ կիրառել։

Այնուամենայնիվ, կառավարության կողմից այդպես էլ լուրջ քայլեր չարվեցին Հայաստանը զբոսաշրջության և ներդրումների համար գրավիչ դարձնելու ուղղությամբ։ Դա է վկայում նաև այն հանգամանքը, որ վարչապետ Փաշինյանն իր 100 փաստի մեջ զբոսաշրջությունը խթանելու քայլ է ներկայացնում այն, որ շուրջ 350 ավտոգազալցման կայաններում իրականացվում են զուգարանների վերանորոգման աշխատանքներ։

Եթե կառավարությունը զուգարանների վերանորոգումը ներկայացնում է որպես մեծ ցուցանիշ, ապա չպետք է զարմանալ, որ իշխանությունների տված խոստումները փուչիկների պես պայթում են։