Գարեգին 2-րդը կարևորել է հասարակությունն ընտանեկան և բարոյական արժեքներով դաստիարակելը
20:20 , 16 մայիս, 2019Մայիսի 16-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսը հյուրընկալել է Մայր Աթոռի հովանու ներքո գործող «Էօրնեկեան» հանրակրթական դպրոցի 10-րդ և 11-րդ դասարանների չորս աշակերտների՝ ուղեկցությամբ դպրոցի տեսուչ, Մայր Աթոռի Քրիստոնեական դաստիարակության կենտրոնի տնօրեն Հոգեշնորհ Տ. Զաքարիա ծայրագույն վարդապետ Բաղումյանի և դպրոցի տնօրեն տիկին Սուսաննա Վարդանյանի, տեղեկացնում են Մայր Աթոռի տեղեկատվական համակարգից։
Տեսուչ Հայր Սուրբը, շնորհակալություն հայտնելով Վեհափառ Հայրապետին՝ կրթական հաստատության հանդեպ ցուցաբերվող մշտական ուշադրության և հայրական խնամքի համար, տեղեկացրել է, որ Վեհափառ Հայրապետի կողմից հռչակված Ընտանիքի տարվա շրջանակներում, մայիսի 15-ին` Ընտանիքի միջազգային օրը, դպրոցում կազմակերպվել էր միջոցառում ծնողների համար՝ նպատակ ունենալով նրանց ուշադրությունը հրավիրել ընտանեկան արժեքներին, ինչպես նաև աշակերտներն այցելել էին ապրիլյան քառօրյայում զոհված զինվորի ընտանիքի անդամներին և հանդիսություն կազմակերպել «Քյուրքչյան» խնամքի կենտրոնի երեխաների համար:
Այդ արժեքների զորացման գործում Հայր Զաքարիան կարևորեց եկեղեցու կրթադաստիարակչական առաքելությունը` ընդգծելով, որ որքան հզոր և ամուր է ընտանիքը, այնքան ուժեղ է ժողովուրդն ու պետությունը:
Գարեգին Բ. Վեհափառ Հայրապետը, իր հայրական օրհնությունը փոխանցելով աշակերտներին, ընդգծել է դպրոցականների և երիտասարդության մեջ ընտանեկան և հոգևոր-բարոյական արժեքների սերմանման կարևորությունը` հորդորելով նրանց ամեն ջանք գործադրել՝ լավ մարդ և քրիստոնյա լինելու համար։
Նորին Սրբությունը նշել է, որ դարերի ընթացքում հայի համար ընտանիքն ընկալվել է իբրև փոքրիկ դրախտ և սրբություն, պատմության ընթացքում այդ հաստատուն հենքի շնորհիվ են կերտվել հաղթանակները, արձանագրվել ձեռքբերումներն ամենատարբեր ոլորտներում: Խոսելով քրիստոնեական ավանդական ընտանիքի արժեհամակարգը խաթարող ժամանակակից մարտահրավերների և երևույթների մասին` Նորին Սրբությունը կարևոր է համարել հասարակության` ամուր ընտանեկան և բարոյական արժեքներով դաստիարակությունը:
Հանդիպմանը Հայոց Հայրապետն աշակերտներից հետաքրքրվել է նրանց ուսումնական ընթացքով, նախասիրություններով և դպրոցում առկա պայմաններով: