Դանակահարություն Կոտայքի մարզում. հանցագործը ներկայացել է Արաբկիրի ոստիկանություն
16:10 , 15 մայիս, 2019Shamshyan.com-ը գրում է.
SHAMSHYAN.com-ի տեղեկություններով՝ այսօր, մայիսի 15-ին, ոստիկանության Արաբկիրի բաժնի քրեական հետախուզության և համայնքային բաժանմունքների ծառայողների բացատրական աշխատանքների արդյունքում քիչ առաջ ոստիկանության Արաբկիրի բաժին է ինքնակամ ներկայացել Կոտայքի մարզի բնակիչ՝ 33-ամյա Ռաֆիկ Սարգսյանը։
Ինչպես հայտնում է ֆոտոլրագրող Գագիկ Շամշյանը, երեկ՝ մայիսի 14-ին, Աբովյան քաղաքի «Ռ. Հարությունյանի անվան Աբովյան ԲԿ»-ից ոստիկանության Կոտայքի բաժին ահազանգ է ստացվել, որ «կրծքավանդակի ձախ կեսի և որովայնի ծակած-կտրած թափանցող վերքեր» ախտորոշմամբ իրենց մոտ է տեղափոխվել մի քաղաքացի։
Հիվանդանոց են մեկնել ոստիկանության Աբովյանի բաժնի օպերատիվ խումբը՝ բաժնի պետ Արտակ Ղազարյանի և Հայաստանի քննչական կոմիտեի Կոտայքի մարզային քննչական վարչության Աբովյանի քննչական բաժնի խումբը՝ բաժնի պետ Ռուբեն Մկրտչյանի գլխավորությամբ։
Ոստիկաններն ու քննիչները պարզել են, որ վիրավորը Աբովյան քաղաքի բնակիչ՝ 35-ամյա Համազասպ Լալայանն է։
Փաստի առթիվ Աբովյանի քննչական բաժնի պետ Ռ. Մկրտչյանի որոշմամբ ստեղծվել է քննչական խումբ և խմբի ղեկավար Հուսիկ Կարապետյանի կողմից հարուցվել է քրեական գործ՝ ՀՀ քր. օր-ի 112 հոդվածի 1-ին մասի հատկանիշներով։
Գ. Շամշյանի տեղեկություններով՝ քիչ առաջ կասկածյալը ոստիկանության Արաբկիրի բաժնից տեղափոխվել է ոստիկանության Կոտայքի բաժին։
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: