Եթե ուզում եք համեղ հյուրասիրություն ապահովել, ապա շտապեք պատրաստել այս նրբահամ պիրոգը

Բաղադրիչներ

• Խմորի համար՝
• ալյուր - 500 գր
• կաթ - 320 մլ
• կարագ - 50 գր
• խմորիչ - 1,5 թ/գդ
• շաքարավազ - 1 ճ/գդ
• բուսայուղ - 1 ճ/գդ
• Կարամելի համար՝
• կարագ - 60 գր
• եղեգնաշաքար - 0,5 բաժակ
• մեղր - 2 ճ/գդ
• Լցոնի համար՝
• կարագ - 60 գր
• բուսայուղ - 4 ճ/գդ
• դարչին - 2 թ/գդ
• մշկընկույզ (мускатный орех) - 1 թ/գդ
• կոճապղպեղ (имбирь) - 0,5 թ/գդ
• մեղր - 2 ճ/գդ

Պատրաստման եղանակ

Պատրաստում ենք խմորը: Բոլոր բաղադրիչները լցնում ենք հացթուխ մեքենայի մեջ, միացնում «հիմնական հունցում» ռեժիմը: Եթե հացթուխ մեքենա չունենք, վարվում ենք հետևյալ կերպ.
Տարայի մեջ լցնում ենք տաք կաթն ու մեջը լուծում խմորիչը: Ավելացնում ենք շաքարավազն ու մի քիչ թողնում, որ ձուլվի: Ավելացնում ենք ալյուրը, բուսայուղը, սենյակային ջերմաստիճանի կարագն ու խմոր հունցում: Հունցած խմորը սրբիչով ծածկում ենք, տաք տեղում 1-1,5 ժամ թողնում, որ հասունանա:
Այս ընթացքում պատրաստում ենք կարամելը: Կաթսայի կամ թավայի մեջ լցնում ենք կարամելի բաղադրիչներն ու դնում միջին ուժգնության կրակին: Հենց որ զանգվածը սկսում է պղպջել, կրակից վերցնում ենք և լցնում թխվածքի ձևամանի մեջ (զանգվածը կարող է պնդանալ, բայց դա նորմալ է, քանի որ թխելու ընթացքում նորից հալչելու է):
Այստեղ նշենք մի կարևոր քայլ. թխվածքի ձևամանը պետք է լինի ամբողջական (ոչ կոճկվող) և բարձր եզրերով, քանի որ թխելիս կարամելը կարող է դուրս հոսել: Եթե այդպիսին չունեք, ապահովության համար ունեցած ձևամանը դրեք ավելի մեծի մեջ ու այդպես տեղավորեք ջեռոցում:
Պատրաստում ենք լցոնը: Կարագը հալեցնում ենք, ավելացնում բուսայուղը, դարչինը, կոճապղպեղը, մշկընկույզը, մեղրն ու լավ խառնում ենք: Այս զանգվածը պետք է խոհարարական վրձնով քսենք խմորին: Հանգստացած խմորը նորից թեթևակի խառնում ենք ու քառակուսի գրտնակում: Դանակով մոտ 5 սմ լայնությամբ երիզներ ենք կտրում և վրձնով քսում լցոնը:

Խմորի շերտերը պարուրաձև փաթաթում ենք, դնում թխվածքի ձևամանի մեջ՝ սառած կարամելի վրա: Խմորի շերտերը փաթաթում ենք այնպես, որ թխվածքը բարձրանալու տեղ ունենա:

Հավասար լինելու համար պիրոգի երեսը թեթևակի սեղմում ենք և 20 րոպե թողնում տաք տեղում, որպեսզի բարձրանա: Թխում ենք 180 աստիճան տաքացրած ջեռոցում, 25-30 րոպե:

Ջեռոցից հանելուց հետո անմիջապես շրջում ենք ափսեի վրա: Դա պետք է շատ զգուշությամբ անել, քանի որ տակի մասում եղած կարամելը շատ տաք է ու կարող է ձեռքերն այրել: Կարևոր է, որ պիրոգը ձևամանի մեջ չհովանա, այլապես կարամելը կպնդանա, իսկ պիրոգը կկպչի ու կմնա ձևամանի մեջ:

Ահա և վերջ:

Համաձայնեք, որ արժե այսպիսի պիրոգ հյուրասիրել ընկերներին. նրանք հաստատ կգնահատեն Ձեր ջանքերը։