168.am-ը գրում է.
Շրի Լանկայի նախագահ Մայտրիպալա Սիրիսենան հայտարարել է, որ երկրում տեղի ունեցած ահաբեկչությունները կարող են ծրագրված լինել արտերկրում: Այս մասին նա խոսել է Sky News-ին տված հարցազրույցում:
«Շատ հավանական է, որ ահաբեկիչները շփման մեջ են եղել արտերկրում գտնվող անձանց հետ, ովքեր էլ օգնել են նրանց»,- հայտարարել է Սիրիսենան:
Նա հավելել է նաև, որ «Իսլամական պետություն» ահաբեկչական խմբավորումը նոր ռազմավարությամբ է հանդես գալիս, որի թիրախն արդեն ոչ մեծ պետություններն են:
Շրի Լանկայի նախագահը կոչ է արել խմբավորման ղեկավար Աբու Բաքր ալ-Բաղդադիին հանգիստ թողել իր երկիրը:
Սուրբ Զատկի օրը` ապրիլի 21-ին Շրի Լանկայում տեղի ունեցած պայթյունների հետևանքով մահացել էր շուրջ 260 մարդ: Կատարվածի պատասխանատվությունը ստանձնել է «Իսլամական պետություն» ահաբեկչական խմբավորումը: