Նրբաբլիթներով աղանդեր՝ հունգարական ձևով


08:46 , 1 մարտ, 2019

Նրբաբլիթներով այս աղանդերը հունգարական ամենահայտնի բաղադրատոմսն է, որի բազմաթիվ տարբերակներ կարելի է համտեսել Բուդապեշտի սրճարաններում: Իսկ մենք առաջարկում ենք պատրաստել ինքնուրույն և համտեսել տանը

Բաղադրիչներ

  • Նրբաբլիթի համար`
  • ձու - 2 հատ
  • կաթ - 200 մլ
  • ալյուր - 160 - 200 գ
  • Լցոնի համար՝
  • ռոմ - 150 գ (կամ կոնյակ)
  • չամիչ - 40 գ
  • ընկույզ - 180 գ
  • կիտրոն - 1 հատ (կեղև, կամ նարնջի)
  • սերուցք՝ 30-35% յուղայնությամբ - 100 գ
  • շաքարավազ - 80 գ
  • դարչին - մեկ պտղունց
  • Շոկոլադե սոուսի համար՝
  • կաթ - 250 մլ + մի քանի ճ/գդ
  • սերուցք 30-35% յուղայնությամբ - 150 մլ
  • ձվի դեղնուց - 3 հատ
  • շաքարավազ - 100 գ
  • վանիլին - 10 գ
  • սև շոկոլադ - 100 գ
  • կակաո - 50 գ
  • Ինչպես նաև`
  • կարագ - տապակելու համար

Պատրաստման եղանակը

Չամիչն ու կիտրոնի մանր քերած կեղևը թրջում ենք 150 մլ ռոմի կամ կոնյակի մեջ ու թողնում ողջ գիշեր:
Պատրաստում ենք նրբաբլիթները: Ձուն սառը ձեռքի հարիչով կաթի հետ հարում ենք, քիչ-քիչ ավելացնում ալյուրը՝ լավ խառնելով, որպեսզի ստացվի համասեռ հեղուկ խմոր: Անհրաժեշտության դեպքում ավելացնում ենք կաթ, մինչև ստացվի ջրիկ թթվասերի խտության խմոր: Տապակում ենք 12 բարակ նրբաբլիթ, յուրաքանչյուրի վրա մի պտղունց շաքարավազ ենք ցանում:
Պատրաստում ենք լցոնը: Սերուցքը հասցնում ենք եռման, մեջն ենք լցնում խոշոր աղացած ընկույզները, շաքարավազը, դարչինը: Չամիչն ու ցիտրուսների քերուկը հանում ենք ռոմից, լցնում սերուցքի մեջ: Ստացվում է խյուսանման զանգված: Եփում ենք մի քանի րոպե, որպեսզի շաքարավազը հալչի: Կրակից վերցնում ենք, ավելացնում ալկոհոլի կեսը (որի մեջ թրջել էինք չամիչն ու ցիտրուսների կեղևը), խառնում ու թողնում՝ հովանա:
nrbablitnerov-axander-hungarakan-dzevov-1
Պատրաստում ենք շոկոլադե սոուսը: Սերուցքը մեծ կաթսայի մեջ հարում ենք, մինչև լավ փրփրի, բայց շատ չխտանա: Շոկոլադը հալեցնում ենք գոլորշու վրա կամ մարմանդ կրակին: Դեղնուցները 30 գ շաքարավազի հետ տրորում ենք, ավելացնում կակաոն և նորից տրորում: Այնուհետև ավելացնում ենք հալեցրած տաք շոկոլադը, մի քանի ճաշի գդալ կաթն ու ձեռքի հարիչով հարում այնքան, մինչև համասեռ զանգված ստացվի:
Կաթը 70 գ շաքարավազի ու վանիլինի հետ հասցնում ենք եռման: Կրակից վերցնում ենք ու բարակ շիթով լցնում շոկոլադային  զանգվածի մեջ՝ վերջինս անընդհատ խառնելով:
Ստացված զանգվածին քիչ-քիչ ավելացնում ենք հարած սերուցքը: Եվ, վերջապես, մեջը լցնում ենք ալկոհոլի մնացած կեսը: Արդյունքում ստացվում է շատ նուրբ, թեթև ու փքուն շոկոլադային սոուս:
nrbablitnerov-axander-hungarakan-dzevov-2
Ամեն մի նրբաբլիթի մեջ դնում ենք լցոնը, խողովակաձև կամ եռանկյունի փաթաթում:
nrbablitnerov-axander-hungarakan-dzevov-3
Մատուցելուց առաջ թեթևակի տապակում ենք կարագով, իսկ ափսեի մեջ դնելուց հետո վրան շոկոլադային սոուս լցնում:
nrbablitnerov-axander-hungarakan-dzevov-4
Ահա և վերջ:
nrbablitnerov-axander-hungarakan-dzevov-5

Այս շատ համեղ ու օրիգինալ նրբաբլիթներով արժե ուրախացնել հատկապես սպասված ու սիրված հյուրերին։