Շոկոլադե սենդվիչներ

Պատրաստում ենք խմորը: Կարագը դնում ենք փոքրիկ կաթսայի մեջ և հալեցնում մարմանդ կրակին: Կաթը թեթևակի սառեցնում ենք, ավելացնում վանիլինը: Ձվերն ու շաքարավազը 5 րոպե հարում ենք:

Ալյուրը, եգիպտացորենի օսլան, շաքարի փոշին ու փխրեցուցիչը մաղում ենք կաթսայի մեջ, ավելացնում տաքացրած կարագը, կաթը, շաքարավազը և ձվային խառնուրդը: Հարում ենք, լցնում 20×30 չափսի ձևամանի մեջ, 20 րոպե թխում 180 աստիճան տաքացրած ջեռոցում (թխված լինելը կարելի է ստուգել փայտիկով): Ջեռոցից հանելուց հետո թխված խմորը դնում ենք ցանցի վրա և հովացնում:

Պատրաստում ենք սպիտակ շոկոլադով կրեմը: Սպիտակ շոկոլադն ու սերուցքը կաթսայի մեջ տաքացնում ենք, խառնում այնքան, մինչև համասեռ դառնա:

Պատրաստում ենք մուգ շոկոլադե սոուսը: Կարագը, շոկոլադն ու կակաոն լցնում ենք կաթսայի մեջ և մարմանդ կրակին հալեցնում: Կրակից վերցնում ենք, ավելացնում շաքարի փոշին, կաթն ու մշկընկույզը (եթե սոուսը շատ խիտ է ստացվում, կարելի է մի փոքր տաք ջուր ավելացնել):

Սառած խմորի շերտը հավասարաչափ քառակուսիների ենք բաժանում:

Կոկոսի քերուկը լցնում ենք ոչ շատ խորը կաթսայի մեջ: Խմորի ամեն մի կտորը մտցնում ենք շոկոլադե սոուսի մեջ:

Այնուհետև թաթախում ենք կոկոսի քերուկի մեջ:

Թաթախված կտորները շարում ենք ցանցի վրա:

Չորանալուց հետո երկայնակի կիսում ենք և արանքներում քսում սպիտակ շոկոլադով կրեմը:

Ահա և վերջ: