Անգամ խմելու հետ սեր ունեցող գիտնականներ են եղել, բայց պլանքաշ անվանի գիտնականի և ոչ մի անուն չեմ իմանում

Քանի որ համացանցում ծխելու դեմ արշավը սահուն սկսեց վերափոխվել ուռելու քարոզի մեր որոշ շոուբիզնեսյան դեմքերի թեթև ձեռամբ, ապա մի օրինակ եմ ուզում բերել և որպեսզի որևէ մեկին չնեղացնեմ, կբերեմ այն ինձ վրա։

Ես ծխող եմ։ Երկար տարիներ ծխում եմ ու երկար տարիներ ծխելու եմ, որովհետև, առաջին հերթին, դա ինձ դուր է գալիս։ Միևնույն ժամանակ ես գիտակցում եմ այն առողջական ռիսկերը, որ այդ սովորույթը կրում է, ու հաստատ գիտեմ, որ եթե վնասների մասշտաբը մի քիչ ուռճացված կարող է լինել, ապա օգուտ այն հաստատ չի բերում։ Դրա համար պետք է լինել չափավոր ու նրբանկատ չծխողների հանդեպ ու չծխողների միջավայրում լինելիս։ Հիմա, եթե տարիներ անց ես իմանամ, որ երեխաս ծխում է, դա ինձ չի ուրախացնի: Ավելին՝ դաստիարակության մեջ կանեմ ամեն հնարավորը, որպեսզի ինքը ոչ միայն նեգատիվ վերաբերմունք ձևավորի երևույթի նկատմամբ, այլ հնարավորինս քիչ առերեսվի իմ ծխելու հետ։

Միևնույն ժամանակ, եթե երեխուս ուռելուց բռնացնեմ, ճիպոտով նենց կդաղեմ, որ մի շաբաթ նստել չկարողանա։ Ու դա այն պարագայում, երբ ես մարմնական պատիժը՝ որպես դաստիարակության միջոց, չեմ հարգում։ Ու մի պատմեք ինձ, թե ինչպես է ամբողջ առաջավոր մարդկությունը տիեզերք յուրացնում մարիխուանա քաշելով։ Անձամբ ինձ հայտնի են բազմաթիվ ակնառու գիտնականներ, որոնք, օրինակ, ծխել են։ Անգամ խմելու հետ սեր ունեցող գիտնականներ են եղել, որոք բեկում են մտցրել զարգացման մեջ, բայց պլանքաշ անվանի գիտնականի և ոչ մի անուն չեմ իմանում։