Կարտոֆիլը լվանում ենք և 12-15 րոպե կեղևով եփում։ Շատ հարմար են փոքր չափի կարտոֆիլները։ Եփվելուց հետո ջուրը թափում ենք և կափարիչը բացում, որ ավելորդ խոնավությունը դուրս գա միջից։
Այնուհետև դեռևս տաք կարտոֆիլը մաքրում ենք, խոշոր կտրատում (4 մասի ենք բաժանում) և վրան լցնում թթու դրած վարունգի ջուրը։ Եթե թթու դրած վարունգ չունենք, կարող ենք մարինացված վարունգի ջուրն օգտագործել։ Թողնում ենք՝ կարտոֆիլն աղաջուրը ներծծի։
Գլուխ սոխը մաքրում ենք և կիսաշրջանաձև կտրատում։
Սունկը կտրատում ենք։
Բուսայուղով թավայի մեջ տապակում ենք սոխը, ավելացնում ենք սունկը և մոտ 10 րոպե տապակում ենք։
Տապակած զանգվածը լցնում ենք կարտոֆիլի վրա։ Թթու կամ մարինացված վարունգը կտրատում ենք։
Ավելացնում ենք կարտոֆիլով զանգվածի մեջ։ Աղցանը խառնում ենք, փորձում ենք, անհրաժեշտության դեպքում աղ ավելացնում։
Հնարավոր է՝ բուսայուղի կարիք էլ չլինի (տապակած սնկի բուսայուղը կարող է բավական լինել)։
Աղցանը մատուցում ենք տաք վիճակում և ցանկության դեպքում վրան կանաչի ենք ցանում։