Ադրբեջանի ԱԳՆ-ի շանտաժային պատասխանը Փաշինյանին


22:33 , 31 հունվար, 2019

Պաշտոնական Բաքուն արտգործնախարարության մակարդակով պատասխանեց Հայաստանի վարչապետ Նիկոլ Փաշինյանի այն հայտարարությանը, որ արցախյան հակամարտության լուծման համար Հայաստանը չի դիտարկում «տարածքներ՝ կարգավիճակի դիմաց» բանաձևը։

«Դժվար է հասկանալ Փաշինյանի տրամաբանությունը, քանի որ ԵԱՀԿ Մինսկի խմբի համանախագահների հովանու ներքո անցկացվող հայ-ադրբեջանական հակամարտության կարգավորման բանակցությունների անկյունաքարը հենց հայկական զորքերի դուրսբերումն է Ադրբեջանի օկուպացված տարածքներից»,- վրդովված բարբաջում են Բաքվից։ Ադրբեջանցիները նաև հիշեցնում են մեզ ՄԱԿ-ի 4 բանաձևերի մասին, որոնք, ըստ իրենց, իբրև թե ադրբեջանամետ են։ Իսկ հայտարարության վերջում էլ հարց են տալիս․ «Արդո՞ք Փաշինյանի այս դիրքորոշումը չի նշանակում, որ վերջինս հրաժարվում է բանակցություններից»։

Պաշտոնական Բաքուն ևս մեկ անգամ ապացուցեց, որ չի հրաժարվել իր մաքսիմալիստական տեսակետից Արցախի հարցում։ Նա Հայաստանի հետ բանակցություններում շարունակում է առաջնորդվել «կա՛մ ամեն ինչ, կա՛մ ոչինչ» կարգախոսի համաձայն։

Ստացվում է, որ Փաշինյան-Ալիև հանդիպումը Դուշանբեի վերելակում, որից հետո ՀՀ վարչապետը տպավորված էր մնացել Ալիևից, ինչպես նաև Մնացականյան-Մամեդյարով՝ Փարիզում տեղի ունեցած 4-ժամյա և կրկին Փաշինյան-Ալիև դավոսյան 1,5-ժամյա Հայաստանի իշխանությունների մի քանի ներկայացուցիչների կողմից տարբեր կերպ մեկնաբանվող հանդիպումները որևէ բան չեն փոխել արցախյան հակամարտության շուրջ ընթացող բանակցությունների վերաբերյալ պաշտոնական Բաքվի մոտ, իսկ ՀՀ արտգործնախարարն այն հույսն ուներ, որ այդ «ավելի լավ իրար զգալու» ադրբեջանցիների հետ երկարատև հանդիպումներն ինչ-որ բան կփոխեն պաշտոնական Բաքվի մոտ, քանի որ եթե պաշտոնական Երևանն, ընդառաջ գնալով ԵԱՀԿ Մինսկի խմբի համանախագահների՝ Հայաստանի և Ադրբեջանի ժողովուրդներին խաղաղության նախապատրաստելու կոչին, քայլեր է ձեռնարկում, ապա Ալիևը և Մամեդյարովը բանակցություններն օգտագործում են զենք գնելու մրցավազք հրահրելու և հայատյացությունն Ադրբեջանում ավելի խորացնելու համար։

Հայաստանի իշխանությունները պետք է զերծ մնան պատրանքներից և հարազատ հասարակությանը ոչ թե պետք է վախեցնեն պատերազմի կատաստրոֆաներով, այլ գնահատելով խաղաղությունը միշտ պատրաստ լինեն պատերազմի։

ՀԳ. Ադրբեջանի ԱԳՆ-ի հայտարարությունը տարրական շանտաժ է, որին Երևանը պետք է համարժեք պատասխան տա։ Փաշինյանի հայտարարությունը որակելով որպես բանակցություններից հրաժարվելու միջոց՝ պաշտոնական Բաքուն բացահայտ շանտաժում է ոչ միայն հայկական կողմերին, այլև Մինսկի խմբի համանախագահներին՝ բոլորին պարտադրելով իր օրակարգը։

Դե, թուրքի լկտիությունն անսահման է։