Իտալական սերուցքային պանիրը` մասկարպոնեն, ունի կրեմանման կազմություն և նուրբ սերուցքային համ։ Նրանով պատրաստվում են անչափ համեղ աղանդեր, որոնցից ամենատարածվածները թերևս «Չիզքեյք»-ն ու «Տիրամիսու»-ն են։ Իսկական մասկարպոնե պանիրը ոչ բոլորին հասանելի, թանկ հաճույք է, սակայն, բաղադրատոմսն իմանալով, մենք կարող ենք այն պատրաստել ու վայելել:
Եվ այսպես անցնենք գործի:
800 գր մասկարպոնե պատրաստելու համար մեզ անհրաժեշտ է 1 լ 30% և ավելի յուղայնությամբ սերուցք (կաթնային), 3 ճ/գդ կիտրոնահյութ, ինչպես նաև կաթսա, մաղ, քամիչ և թանզիֆ։
Կաթսան դնում ենք միջին ուժգնության կրակի վրա, լցնում սերուցքը և փայտե թիակով խառնելով` հասցնում ենք գրեթե եռման աստիճանի։ Երբ պղպջակներ են առաջանում, կաթսան անմիջապես վերցնում ենք կրակի վրայից։ Ակտիվ խառնելով ավելացնում ենք կիտրոնահյութը, այնուհետև այն կրկին դնում ենք թույլ կրակի վրա և խառնում մոտ 2 րոպե, մինչև առաջին փոքր անհամասեռությունը նկատվի: Անմիջապես վերցնում ենք կրակից և թողնում սառչի:
Այդ ընթացքում սերուցքն անցնում է 3 փուլ. 1-ին փուլում կտրվում է, 2-րդ-ում` կեֆիրի կազմության դառնում, իսկ արդեն 3-րդ-ում` վերածվում է թանձր կրեմի։
Թանձր կրեմը լցնում ենք 4-5 տակ մարլյայով պատված մաղի մեջ, որի տակ դատարկ աման ենք դնում։ Զանգվածն այդպես թողնում ենք մոտ 1 ժամ մինչև շիճուկն ամբողջովին առանձնանա:
Ահա և վերջ: Մասկարպոնեն պատրաստ է ։