«Մարդասպան Մհերն է խոսում սիրուց, այն նույն մարդասպանը, ով սպանեց մեր սերը, սպանեց մեր որդուն»․ Միխայիլ Աղաջանով


22:00 , 9 հունվար, 2019

Հարգելի ընթերցող, արդեն 23-րդ Ամանորն ենք դիմավորում առանց որդուս, առանց լուսավոր մի երիտասարդի, ով այս կյանքում միայն 19 Ամանոր դիմավորեց, ով սիրում ու սիրված էր, ով ապրում ու ապրեցնում էր, ով դեռ, ով գիտի, ինչքան երազներ ուներ այս կյանքում, բայց... 

Ամեն ինչ կտայի, որ մարդասպան, իսկ հիմա «սեր ու համերաշխություն» գոռացող Մհեր Ենոքյանը հանդիպած չլիներ որդուս, ամեն ինչ կտայի, որ հիմա ստիպված չլինեի թղթին տալ, ինչ մտածում եմ։

Հիմա ստիպված եմ գրել, ստիպված եմ հանուն արդարության ու որդուս պայծառ հիշատակի անդրադառնալ «ՍԵՐ ու ՀԱՄԵՐԱՇԽՈՒԹՅՈՒՆ» գոռացող մարդասպանի՝ մեզ ուղղված հրապարակային խոսքին, խոսք, որում ստոր սուտն է գերակշռում, խոսք, որին «բռավո» է գոռում հասարակության մի զանգված։

Անկեղծ, չեմ հասկանում. իմ միտքն ի զորու չէ հասկանալու, թե մարդասպանին հրապարակային «բռավո» գոռալուց և ստոր ստեր պարունակող հոդվածների տակ մեկնաբանություններ անելուց առաջ ինչ են մտածում մարդիկ, արդյոք նրանք մտածում են այն մասին, թե ինչ կզգային իրենք, երբ մհերներն իրենց հարազատի պարանոցը կտրեին, որից հետո բարձր, շատ բարձր սեր ու համերաշխություն գոռային, արդարությունից ու արդարադատությունից խոսեին, արդյոք նրանք երբևէ մտածո՞ւմ են այն մասին, թե ինչ ենք զգում մենք իրենց «բռավոները» կարդալիս։

Մի՞թե մեր հասարակությունում դեռ կան այնպիսինները...

Բանը նրան է հասել, որ արդեն մեզ` Աղաջանովներիս՝ մտավորականի ընտանիքին, ստոր կերպով զրպարտում են, թե՝ 

Ստոր ստերի շարան, ստեր, որոնց հիման վրա փորձ է արվում հասարակական կարծիք ու ճնշում ձևավորել, մտնել գործից անտեղյակ մարդկանց հոգիներ ու զոհ երևալ։ 

... Ո՞ր ողջամիտ մարդը կհավատա այս ստերին, ո՞ր ողջամիտ մարդը կհավատա նրան, որ աշխարհում կարող է լինել մի բանական մարդ, ո՞վ իր որդուն սպանողի հասցեին ունակ է գովեստի խոսքեր ասելու, և ի՞նչ է նշանակում գումարով հաղորդում պատվիրել, ո՞ւմ դեմ, ինչի՞ համար... Արդարադատությունն իր խոսքը վաղուց ասել է, և ինչպես ցույց են տալիս հարցի շուրջ հանրային հարթակում ծավալվող իրադարձությունները, մենք չենք պատվերների ու ֆեյքերի վարպետները և պետք չէ նրանց իսկ փնտրողից հեռու փնտրել։

Մտածում եմ հիմա՝ ի՜նչ էլ ջանասեր են զբաղվում մարդասպանին հրեշտակ ներկայացնելու փիառով, և ո՞ւմ է դա պետք, անձնակա՞ն, թե՞ խմբային շահեր կան այստեղ, իսկ միգուցե ա՞յլ...

Մարդասպան Մհերն արդեն սեր ու համերաշխություն գոռալով ու կուրծք ծեծելով է շարունակում մեղանչել Աղաջանովներիս դեմ։ Մարդասպան Մհերն է խոսում սիրուց, այն նույն մարդասպանը, ով սպանեց մեր սերը, սպանեց մեր որդուն... Համերաշխությունից խոսում է մեկը, ով մինչ օրս հրապարակային ստեր է հրամցնում` մտավորականի ընտանիքիս զրպարտելով ու մեղադրելով տարբեր խարդավանքների մեջ։

Սեր ու համերաշխություն գոռալով չի կարելի սգավոր մարդկանց առջև մեղանչել, սեր գոռալով` սիրող չես դառնա, համերաշխություն գոռալով` հանդուրժող։ Ստոր փորձեր են սրտաճմլիկ հոդվածներ գրելով զոհ երևալը, սպանելուց հետո արդարությունից խոսելը...

Մի օր զղջումի խոսք չարտասանած մարդասպանն է սիրուց խոսում, համերաշխության խրատ տալիս, պետական մակարդակով ներման սպասում...

Մենք քեզ չենք ներել, Աստծուց ներում կհայցես...